Read Goan Konkani Prok 22 Bible Online

Prok 22 - Goan Konkani bible

Prok 22

¹Tedna Devdutan mhaka Jivitachea Udkachi, konvchê porim jhigjhigit, êk nôd dakhoili: Devachea ani Menddreachea xinvasona thaun ti bhair sortali,

²ani Xarachea mukhêl rostea porian vhanvun pavtali. Nodichê dôr-êkê deger Jivitachem ek zhadd aslem; tankam vorsant bara pavtti, dôr-mhoineant êk pavtt, follam zatat; raxttrancheô pidda kaddunk tancheam panank gunn asa.

³Xirap-poddlolem thõi kãi aschench na. Xarant Devachem ani Menddreachem xinvason astelem; Tachim chakram Taka bhôztelim.

⁴Tim Taka rup-rup polletelim ani tancheam kopolar Tachem Nanv boroil’lem astelem.

⁵Rat ani-anink aschi na ani tankam diveanchea vô suriachea uzvaddachi goroz aschi na, kiteak khud Sorvespor Dev tancher Aplo uzvadd ghaltolo ani tim sasnnachea sasnnak razvôtt choloitelim.

⁶Uprant devdutan mhaka sanglem: “Him utram visvas favo-aslelim ani khorim. Provadeank preronn dita tea Sorvespora Devan, vegim kitem ghòddchem asa tem Apleam chakrank dakhounk, Aplea dutak dhaddla.”

⁷“Polleiat — mhonnta Jezu — Hanv rokddo ieuncho zalom! Hea pustokantlim bhakitam samballtat tim subhagi!”

⁸Hanvem, Juanvan, heô soglleô vostu aikoleat ani polleleat. Ani sogllem aikun ani polleun zaina fuddem, mhaka hem sogllem dakhoil’lem tea devdutak bhozunk tacheam pãiam saxttangim poddlom.

⁹Punn tannem mhaka sanglem: “Oxem korum naka! Tujeam bhavam-provadeam ani hea pustokantlim utram samballteleam soit, tuje sarko hanv-ui chakôr. Fokot Devak tunvem bhozunk zai.!”

¹⁰Ani tannem mhaka sanglem: “Hea pustokantlim bhakitam xik’ko marun dhampun dovrinaka; kiteak kall lagim pavla.

¹¹Khotteponn kortat tãnnim khotteponn korit ravchem, ani mhellim asat tim odik mhellim zaunchim; punn Devak manovleleam mon’xamnim Devak man’ta tench korit ravchem, ani povitr mon’xamnim povitrponnan cholot rauchem.”

¹²“Polleiat hanv porot ieuncho zalom! Soglleank, tancheam zonn-ekleacheam kornneam pormannem, farik korunk, Mhoji mozuri gheun Hanv ietam.

¹³Hanv Alfa ani Omega, mhonngê Poilo ani Nimanno, Orômb ani Xevôtt!”

¹⁴Aplim vostram dhutat tim subhagi; oxem korun Jivitachea Zhaddachem foll khaunk ani darvontteantlean Xarant provês korunk tankam hôk’k astolo.

¹⁵Punn ier sogllim Xara bhair astelim: khottim-noxttim mon’xam, ghaddiponn choloitat tim, pozoddponnak lobhdol’lim, khun korpi, murtim-puttleank bhôzpi, ani utramnim toxench jivitachê chalin fottingponnam kortat tim.

¹⁶Hanv Jezu: povitr-sobhank heô vostu kollit korunk Hanvem Mhojea dutak tumchê-xim dhaddla. Hanv To, Davidachê kulliechi Kombri, Hanv To, Fantea-jhigjhigit Noketr!

¹⁷Atmo ani Hokol oxem mhonntat: “Ie!” Hem aikotat titleamnim-i mhonnchem: “Ie!” Konnank tan laglea? Tumi lagim ieunchem! Jivitachem udok zai tumkam? Tumi ieunchem ani funkea tem gheunchem!

¹⁸Jim konn hea pustokantlim bhakitam aikotat, tankam hanv Juanv hi xiddkavnni ditam: heam bhakitank kitem-i choddounk konn-ui fuddem sortit zalear, tankam favo ti khast lavchê lavun, hea pustokar boroil’lim asat tim-i noxttam Dev tanchea mathear denvoitolo.

¹⁹Ani hea pustokantleam bhakitantlem konn-ui kitem-i unnem korunk fuddem sortit zalear, tankam Dev hea pustokar boroil’leô asat teô bhasavnneo bhogunk diuncho na: jivitachea zhaddachem foll khaunk ani Povitr Xarant tthikann korunk tankam mellchem na.

²⁰Heam vostunchi sakxi dita To oxem sangta: “Hôi, Hanv veginch ietam!” Amen! Ie, Somia Jezu!

²¹Somia Jezuchi doiallai tumam-somestank bhogunk mellum. Amen!