Read Goan Konkani Prok 3 Bible Online

Prok 3 - Goan Konkani bible

Prok 3

¹“Sardisantlê povitr-sobhechea dutak oxem boroi: ‘Devache sat atme ani sat noketram dhorun asa Tacho ho sondêx: Tum kitem kortai tem hanv zannom. Lôk tum jivo asai mhonn dhôrta, punn khorench mhonn’lear tum mel’lo asai.

²Tujem jivit Mhojea Devacheam dolleam mukhar sopurnn mhonn Mhojean mhonnunk zaina dekhun, zago za, ani jem kitem tuka ozun urlam, taka novi ghottai di; na tôr tem-i sarkench morun vetelem.

³Hea pasot kosli xikovnn tuka dil’li ani tunvem aikol’li ticho ugddas kôr, ti samball ani tujem jivit bodôl. Tum zago zaina zaxi zalear, chôr koso Hanv ietolom, ani Hanv ieun tujer poddtolom ti ghoddi tuka kollchi porian na.

⁴Punn Sardisant tumchê modleam kãi zannamnim aplim vostram nitoll samball’leant; tim Mhojê borabôr dhovem nhesun bhonvtelim, karonn oxem korunk tim purtim.

⁵Zoit vhortoleank osli dhovi nhesônn Dev nhesoitolo ani tanchem nanv Jivitachea pustoka velem Hanv kaddun uddouncho na, punn Mhojea Bapa mukhar ani Tacheam dutam hujir tim Mhojim mhonn ollkhun ghetolom.

⁶Jem kitem Atmo povitr-sobhank sangta, tem kan asleleamnim aikunchem.’ ”

⁷“Filadelfientlê povitr-sobhechea dutak oxem boroi: ‘Zo Povitr ani Khoro, Tacho ho sondêx: Tachê lagim Davidachi chavi asa: jem To ugôddta tem konnacheanuch dhampunk zaina, jem To dhampta tem konnacheanuch ugddunk zaina.

⁸Tum kitem kortai tem Hanv zannom; tujê fuddem Hanvem ek dar ugôddlam, tem konnacheanuch dhampunk zaina. Tuka ili-xi xokti asa, tori Mhoji xikovnn tunvem pall’leai ani Mhaka tum visvaxi ravlai.

⁹Polle, Soitanacheam pongddacheank, Judev nhoi astam apunn Judev mhonn sangtat team fottkireank, tujê mukhar haddtolom ani tuka pãiam poddunk laitolom; tuzo Hanv môg kortam mhonn tedna tankam kolltelem.

¹⁰Addkhollimnim thir ravunk Mhoji adnea tunvem pall’leai dekhun, Hanv-ui Mhojê pallien akhea sonvsaracher ieunchem asa tea noxttantlo tuka vattaitolom; hem noxtt soglleam lokanchi porikxa korchê khatir sonvsaracher ietelem.

¹¹Hanv ieuncho zalom. Tuka asa to bhavart surokxit samball; tujea zoitacho mukutt tujê koddcho kaddunk konnakuch dium naka.

¹²Zoit vhorteleank Mhojea Devachea Mondirantle Hanv khambe kortolom, ani thõisorlim tim anink bhair sorchim nant. Tancher Mhojea Devachem Nanv ani Mhojea Devachea Xarachem nanv, mhonngê Mhojea Deva koddsun sorgar thaun denvto novea Jeruzaleachem nanv, Hanv boroitolom. Mhojem-i novem Nanv Hanv tacher boroitolom.

¹³Jem kitem Atmo povitr-sobhank sangta, tem kan asloleamnim aikunchem.’ ”

¹⁴“Laodixeientlê povitr-sobhechea dutak oxem boroi: ‘Zo Amen, Zo Visvaxi ani Khoro Sakxi, akhê Devachê rochnecho Orômb, Tacho ho sondêx:

¹⁵Tum kitem kortai tem Hanv zannom. Tum xello-i nhoi ani un-ui nhoi. Kitem tori êk, xello vô un, tum zaunk zai asloi!

¹⁶Punn, xello-i ani un-ui nhoi zaun, tum xellmoddo dekhun, tuka Hanv onkun Mhojea tonddantlo bhair uddoitolom!

¹⁷“Hanv girest ani xrimont, ani mhaka kãi unnem na”, oxem tum mhonntai; punn kitlo tum dolldiro, konixtt, gorib, kurddo ani vingllo, tem tum noklloi.

¹⁸Hea pasot Hanv tuka hi budh ditam: girest zaunchê khatir Mhojê koddsun ujean nirbhel kel’lem bhangar tum viktem ghe, ani tuka nhesunk ani tujea vinglleponnachi loz dhampunk dhovim vostram ghe, ani tuka dixtti poddchê khatir dolleank kaddunk lêp ghe.

¹⁹Zancho Hanv môg kortam, tankam Hanv zupatti ditam ani dêkh xikoitam. Hea khatir hurben bhoron tujem jivit bodôl.

²⁰Ho polle Hanv darachea umbrear asam ani darar martam; Mhozo tallo aikun konn Mhaka dar ugtem kortit, tanchea ghorant Hanv bhitôr sortolom, tanchê borabôr jevtolom, ani tim Mhojê borabôr jevtelim.

²¹Hanv zoitivont zalam ani atam Mhojea Bapachê kuxik Tachea xinvasonar boslam, têch porim zoit vhorteleank Mhojê kuxik Mhojea xinvasonar bosunk ditolom.

²²Jem kitem Atmo povitr-sobhank sangta, tem kan asloleamnim aikunchem.’ ”