Read Goan Konkani Prok 4 Bible Online

Prok 4 - Goan Konkani bible

Prok 4

¹Hea uprant, mhaka hem dorxon mell’lem: ovchituch sorgar ek ugttem dar hanvem pollelem. Ani tuturê sarko sadovto, hanvem adim aikol’lo tallo mhaka oxem mhonn’talo: “Hangasôr voir ie, ani fuddarak kitem ghòddchem asa tem Hanv tuka dakhoitolom.”

²Tednanch Povitr Atmean mhaka Aplea tabeant ghetlo. Thõi sorgar konn-eklo bosun asto ek xinvason aslem hanvem dekhlem.

³Ani thõi bosun asleleachem mukhamoll eka jhighikit mannka porim ani eka tambddea motia vori zhog-zhoktalem; xinvasona bhonvtim pachu sarkem ek donddubal aslem.

⁴Hea xinvasona bhonvtim chovis sodreo asleô ani tancher dhovem nheslele ani tokler bhangarache mukutt ghalun aslele chovis zannte asle.

⁵Xinvasona thaun bhair sortalim zhoglannim ani goddgoddeancho avaz. Xinvasona mukhar sat pettlele dive zolltale te Devachê chakrek aslele sat atme.

⁶Toxench xinvasona mukhar suriakanta vori aspas porzolltolo konvchecho somdir koso aslo. Modem xinvasona bhonvtonnim, pattlean ani fuddlean zaiteam dolleancheô chear jiveô rochnna asleô.

⁷Poili rochnna eka xinva bhaxen distali, dusri eka paddkulea bhaxen, tisrek eka mon’xachem tondd aslem, ani chovti rochnna êkê udd’to ghonni sarki distali.

⁸Char-ui jiveam rochnnank, ek-ekleak, sov pakotte asle ani tankam sobhonvtim, bhailean ani bhitorlean, khub dolle asle. Dis ani rat tham-bonastana teô rochnna oxem gait asleô: “Povitr, Povitr, Povitr Sorvespor Dev, Sorvpodvedar! To aslo, To asa, ani To ieuncho asa!”

⁹Jitlê pavtti teô rochnna xinvasonar boslolo asa ani sodam-sorvodam jieta Taka mhoimechim, stutichim ani dhin’vasnnechim gitam gaitaleô,

¹⁰titlê-i pavtti chovis-ui zannte xinvasonar boslolo asa Tacheam pãiam poddtale ani sodam-sorvodam jieta Tachi puza kortale. Aple mukutt xinvasona mukhar uddoun te mhonntale:

¹¹“Sorvespora, amchea Deva, soglleam vostuncho Rochnnar Tum, Tujê khuxen teô rochun aileat ani vortunk lagleat, dekhun, Tuji podvi ollkhun, soglleamnim Tuka mhoima ani bhovman diunk favo.”