Read Goan Konkani Prok 5 Bible Online

Prok 5 - Goan Konkani bible

Prok 5

¹Xinvasonar bosun aslo Tachea uzvea hatant êk kovllo hanvem dekhlo; fuddlean-pattlean tacher boroil’lem aslem, ani sat xik’ke marun to bond kel’lo aslo.

²Ani hanvem êk khoddegant devdutak pollelo; to vhoddlean oso arddolo: “He xik’ke foddunk ani kovllo ugddunk konnak tank asa?”

³Punn sorgar, nhoi mhonn sonvsarant ani mel’leanchea konddant porian, kovllo ugto korunk ani vachunk tank aslolo konnuch mell’lunk na.

⁴Kovllo ugddunk ani to vachunk purto konnuch mell’lo na dekhun hanv dukamnim roddlom.

⁵Tedna zannteam modlea eklean mhaka mhonn’lem: “Roddum naka; polle, Judachea kullantlea Xinvan, Davidachê Kombren, zoit vhelem; te sat xik’ke foddunk ani kovllo ugddunk Taka tank asa.”

⁶Tedna polle zalear, char jiveam rochnnam ani zannteam modem xinvasonachea mazar êk Menddro ubo aslolo hanvem dekhlo; hea Menddreak jivexim marlolo mhonn Tache ghai dakhoitale; Taka sat xingam ani sat dolle asle; he dolle mhollear Devachê sevek aslele ani akhea sonvsarant pattoil’le sat atme.

⁷Fuddem sorun Menddrean xinvasonar bosun Asloleachea uzvea hatantlo kovllo ghetlo.

⁸Tannem to ghena fuddem, char jiveô rochnna Menddrea mukhar sorpott poddleô; toxench chovis zannte-i sorpott poddle. Hanchê modlea zonn-eklea lagim êk kin’nori asli ani dhumpan bhòrlelim bhangarachim aidonam; him aidonam mhonn’lear bhoktanchim magnnim.

⁹Te ek novem git oxe gaitale: “Kovllo gheunk ani tache xik’ke foddunk Tum purto, karonn Tuzo jiv kaddlo; ani soglleam kullancheam, soglleam bhasancheam, soglleam porzancheam ani raxttrancheam mon’xank Tujea vikrail’lea rogta udexim Tunvem soddoun Devak dileãi.

¹⁰Amchea Devachi seva korunk Tunvem tankam Tujê razpodvent ani iadnikent vantto diloi, ani tim prithumer raj choloitelim.”

¹¹Mhojea dorxonant devdutanchê êkê urponjicho tallo hanvem aikolo. Te xinvasona, jiveam rochnnam ani zannteam bhonvtonnim asle. Tancho ankddo mhonn’lear kottincheô kotti ani hozaranche hozar.

¹²Ani te soglle arddun oxem gaitale: “Jivexim marlelea Menddreak favo soglli podvi, toxench doulôt, zannvai, boll, mhoima, stuti ani vakhann’nni!”

¹³Ani sorga veleô ani sonvsarantleô, patallantleô ani somdirantleô soglleô rochnna — mhonngê akhê srixttint asat teô soglleô rochnna — oxem mhonntaleô teô hanvem aikoleô: “Xinvasonar boslolo asa Taka ani Menddreak vakhann’nni, mhoima, stuti ani podvi sasnnachea sasnnak!”

¹⁴Char jiveô rochnna oso zobab ditaleô: “Amen!” Ani zannte saxttangim poddun bhôztale.