Read Goan Konkani Prok 6 Bible Online

Prok 6 - Goan Konkani bible

Prok 6

¹Magir mhojea dorxonant Menddro satantlo poilo xik’ko fôddta to hanvem dekhlo, ani char jiveam rochnnantlea ekan goddgoddeacho koso avaz korun “Ie” mhonnta tem hanvem aikolem.

²Ani polle zalear, êk dhovo ghoddo hanvem dekhlo. Ghoddear bosleleakodde ek dhonu aslem: taka êk mukutt dilo. To jikit jikit gelo ani zoita pattlean zoit vhorunk bhair sorlo.

³Uprant Menddrean dusro xik’ko fôddlo, ani dusri jivi rochnna “Ie” mhonnta tem hanvem aikolem.

⁴Dusro êk ghoddo bhair sorlo; to tambddo-lal aslo. Tacher bosleleak sonvsarant xanticho nas korunk ani mon’xamnim ekamekacho jiv kaddchê khatir tankam challounk podvi dili; dekhun tachea hatant êk vhoddli torsad ghal’li asli.

⁵Uprant Menddrean tisro xik’ko fôddlo, ani tisri jivi rochnna “Ie” mhonnta tem hanvem aikolem. Polle zalear, êk kallo ghoddo mhaka dixtti poddlo; tacher bosleleachea hatant êk tagddi asli.

⁶Char jiveam rochnnam modlo ail’lê porim êk tallo hanvem aikolo. To oxem sangtalo: “Eka dinarak xêr-bhôr gonv, ani eka dinarak zovache tin xer. Olivancheam ani dak-velincheam molleancho ibadd mat korinakat.”

⁷Uprant Menddrean chovto xik’ko fôddlo; ani chovti jivi rochnna “Ie” mhonnta tem hanvem aikolem.

⁸Polle zalear, mhaka matso pachvea rongacho êk ghoddo dixtti poddlo. Tacher bosleleachem nanv Moronn, ani tachê pattapatt mel’leancho patall vetalo. Torsadin, bhuken, pidden ani ran’vott zonavoram udexim sonvsarachea chovtea vantteak marun uddounk tankam podvi dil’li asli.

⁹Tedna Menddrean panchvo xik’ko fôddlo. Jivexim marleleanche zaite otme hanvem vedi khala dekhle. Devachem utor tãnnim porgôttlelem dekhun ani aplea jivitantlean tãnnim thiraien sakxi dil’li dekhun, tankam jivexim marlelim.

¹⁰Tãnnim vhoddlean oxi bob marli: “Povitr ani Satvik Dhonia, sonvsarantleam mon’xanchi zhôddti korunk ani amchea vikrail’lea rogtacho sudd gheunk kedna porian ravtoloi?”

¹¹Tedna tanchê modlea zonn-ekleak Devan êk dhovi nhesônn dili ani tancheam vangddeam-chakranchi ani bhavam-bhoinnincho ankddo bhoron ie-sôr anink thoddo kall ravat mhonn sanglem: kiteak zoxem tankam jivexim marlelim, toxench hancho-i jiv kaddcho asa.

¹²Ani Menddrean sovo xik’ko fôddlo to hanvem dekhlo. Tedna êk motthi dhornnkamp zali, ani suria eka kallea sakottea porim kallo zalo, ani chondrim’ rogta vori tambddo-lal zalo;

¹³zoxem vhoddlem modd ietôch tornnim anjiram rukha velim dhornnir zhoddun poddtat, toxim mollba velim noketram sonvsarar nikllon poddlim.

¹⁴Eka revoddlelea kovllea porim mollob nanch zalem, ani dôr-êk porvôt ani dôr-êk zunvo ap-aplê svatê vele halon pois gele.

¹⁵Tedna sonvsarantle patxai, razpal ani senapoti, girest ani podvedar mon’xam, sogllim gulamam ani svotontr mon’xam, bhiaramnim ani dongracheam khodd-pamnim lipun ravlim.

¹⁶Tãnnim dongrank ani khoddpank oso ulo marlo: “Amcher poddat ani xinvasonar Bosleleachea mukha velim ani Menddreachea krodhantlim amkam lipoiat;

¹⁷karonn Tachea Krodhacho Bhirankull Dis pavla, ani tachê mukhar ubo ravunk konn xokta?”