Read Goan Konkani Prok 7 Bible Online

Prok 7 - Goan Konkani bible

Prok 7

¹Hachê uprant sonvsaracheam char konnxeancher char devdut aslele hanvem pollele. Pritumecher vô doriacher, vô khõichea-i zhaddar varo marchoch nhoi mhonn, pritumeche char-ui vare te addaun dhôrtale.

²Ani jivea Devacho xik’ko gheun dusro êk devdut udenti thaun ieto hanvem pollelo. Pritumek ani somdirak vaitt korunk Devan podvi dil’li team chovgam devdutank tannem vhoddlean oso ulo marlo:

³“Amchea Devacheam chakranchea kopalar êk xik’ko ami marin porian, tumi pritumek, vô somdirak, vô zhaddank vaitt korinakat.”

⁴Ani zancher xik’ko marlo tancho ank kitlo to hanvem aikolo: Israelacheam putam-dhuvancheam soglleam kullantlim ekxem-chovêchallis (144) hozar xik’ko marlelim aslim.

⁵Judacheam kullantlim bara hozar xik’ko marlelim; Rubenachea kullantlim bara; Gadachea kullantlim bara hozar;

⁶Axerachea kullantlim bara hozar; Naftalichea kullantlim bara hozar; Manas’sechea kullantlim bara hozar;

⁷Simanvachea kullantlim bara hozar; Levichea kullantlim bara hozar; Isakarachea kullantlim bara hozar;

⁸Zebulunachea kullantlim bara hozar; Juzechea kullantlim bara hozar; Ben’jaminachea kullantlim bara hozar xik’ko marlelim.

⁹Hachê uprant ovchit êk bhov vhôdd lokachi urpônz hanvem polleli, konnachean mezunk zainasli titli! Soglleam desantli, soglleam kullantli, soglleam porzantli ani soglleam bhasanchi ti urpônz; ani dhovi nesônn ghalun ani apleam hatamnim talliô dhorun, xinvasona mukhar ani Menddrea mukhar ti ubi asli.

¹⁰Tim arddun mhonn’talim: “Xinvasonar bosun aslolea amchea Devak zôi! Toxench Menddreak zôi! Tãnnim amchi soddvônn keli!”

¹¹Xinvasona, zannteam ani char jiveam rochnnam bhonvtonnim ube asle te soglle devdut xinvasona mukhar saxttangim poddle ani Devak tãnnim bhôzlo;

¹²tedna tãnnim oxem mhonn’lem: “Amen! Vakhann’nni, mhoima, zannvikai, dhin’vasnni, bhovman, podvi ani boll amchea Devak sasnnachea sasnnak! Amen!”

¹³Zannteam modlea eklean mhojê kodde vicharlem: “Dhovem nhesleant tim konn, ani khõi thaun tim aileant?”

¹⁴Hanvem oso zobab dilo: “Tunch sang mhaka, saiba.” Tannem mhaka sanglem: “Nixttur dhumalleantlo solamoti pavlo to lôk ho. Tãnnim aplim vostram Menddreachea rogtan dhuleant ani dhovim keleant.

¹⁵Hea pasot tim Devachea xinvasona mukhar ubim asat ani Tachea Gabhareant dis ani rat Tachi seva kortat. Xinvasonar bosun asa To tanchê modem tthikann korun tankam xeronna ghetolo.

¹⁶Tankam anink kednanch bhuk lagchi na, tan-ui lagchi na; suriachem unet tankam hulpaun-chem na, nhoi mhonn koddok-ulpoto gormi lagchina;

¹⁷kiteak xinvasonachea mazar asa to Menddro tancho Gonvlli zatolo, ani To tankam jivea udkacheam zhorim-xim pavoitolo; ani Dev tancheam dolleantlim sogllim dukam pusun kadtolo.