Read Goan Konkani Prok 8 Bible Online

Prok 8 - Goan Konkani bible

Prok 8

¹Menddrean satvo xik’ko fôddlo tedna sumar vordo tas-bhôr sogllem gopchup poddlem.

²Tedna Deva mukhar ube asto sat devdutankodde tutureo dil’leô hanvem dekhleô.

³Anink êk devdut ek bhangarachem dhumpel gheun ailo ani vedi-xim ravlo. Xinvasona mukhar aslelê bhangarachê vedicher bhettounk, soglleam bhoktan-cheam magnneam soit zaito dhump taka dil’lo.

⁴Devdutacheam hatantlo dhump-dunvor soit bhoktancheam prarthonam Deva mukhar voir choddlim.

⁵Tedna devdutan dhumpel ghetlem, tantum vedi vele zollte inglle ghale, ani tem prithumecher xevttilem. Teach farak goddgoddeancho ghonnghonn aikum ailo, zhoglavnnim zhogzhoglim ani dhornn kampli.

⁶Magir devdut ap-apleô tutureô gheun teô vazounk toiar zale.

⁷Poilea devdutan apli tuturi vazoili. Rogta borabôr korveancho ani ujeacho paus prithumecher poddunk laglo. Prithumecho êk tisro vantto lasun gelo, toxench rukham-zhaddancho êk tisro vantto hulpolo, ani soglli axi lasun geli.

⁸Uprant dusrea devdutan apli tuturi vazoili. Ujean lasun veto êk vhoddlo dongôr koso somdirant xevtton poddlo. Somdirachea tisrea vantteachem rogot zalem,

⁹somdirant asleleam jiveam mon’zatincho êk tisro vantto melo ani tarvancho tisro vantto futtun gelo.

¹⁰Tedna tisrea devdutan apli tuturi vazoili. Ek vhoddlem noketr, ujeachem agttem zal’lê porim, mollbar thaun konsllun poddlem. Tem nodinchea tisrea vanttear ani udkancheam zorincher poddlem.

¹¹Tea noketrachem nanv Kôddsann. Udkacho êk tisro vantto koddu zalo, ani koddu zal’lem udok pieun zaito lôk melo.

¹²Magir choutea devdutan apli tuturi vazoili ani suriachea eka tisrea vantteak mar laglo, toxench chondrimachea eka tisrea vantteak, ani noketranchea eka tisrea vantteak. Oso tea-tea tisrea vantteacho porzôll palovlo, mhonntôch disachea porzollacho tinantlo êk vantto komi zalo, toxench ratichea porzollacho.

¹³Uprant polle zalear, unch varear êk gorudd uddto hanvem dekhlo. To oso arddoto hanvem aikolo: “Teg nimanne devdut apleô tutureo vazoitele tedna prithumer jieteleanchem kotta, kotta, kotta!”