Read Goan Konkani Prok 9 Bible Online

Prok 9 - Goan Konkani bible

Prok 9

¹Tedna panchvea devdutan apli tuturi vazoili. Ani mollba thaun prithumecher ek noketr poddlelem tem hanvem dekhlem: tea devdutak Devan khol-khol Patallachi chavi dil’li.

²Noketran patall ugôddlem ani tantlo dhunvôr voir choddlo, eka lamb-rund agtteachea dhunvra sarko. Patallachea dhunvran suria kallo zalo ani akhê prithumecher soglloch kallôk zalo.

³Tea dhunvrantle toll bhair sorun prithu-mecher ximpoddle ani sonvsarant vinchvank boll asa toslench tankam-i boll dilem.

⁴Zomnichea tonnak, vonospotik ani rukhank-zhaddank kitench vaitt korina zaunk, punn aplea kopalar Devacho xik’ko naslo team mon’xank mat vaitt korunk Devan adnea ghali.

⁵Mon’xank jive marunk, tollank odhikar diunk na, punn fokot panch mhoine tankam vollvollaunk tanchean zatalem. Vinchvan mon’xak kuns laitôch veg martat tosli foddafôdd toll mon’xank ditale.

⁶Tea somoiar mon’xam morunk sôdtelim punn tankam mellchem na, mornnak axetelim punn moronn tanchê thaun pois dhanvtelem.

⁷Zhuzak toiar zal’leam ghoddeam porim te toll distale; bhangarache koxe disto tanchê tokler mukutt asle, ani mon’xancheam tonddam sarkim tanchim tonddam aslim.

⁸Bailancheam kensam porim tanche kens asle, ani tanche dant xinvancheam dantam osle.

⁹Tanchê chhatiek lokhonddachem korttem koxem aslem, ani zaiteam ghoddeancheô ghaddiô nettan zhuzak dhanvtana avaz kortat toslo tancheam pakotteancho avaz aslo.

¹⁰Tankam vinchvam porim xempddiô asleô ani xempddiank kunsam, ani apleam xempddiamnim mon’xank panch mhoine vollvollaunk tankam podvi asli.

¹¹Tankam êk patxai aslo, ani to mhonn’lear Patallacher podvi aslolo devdut; Hebrêv bhaxen tachem nanv Ab’badon, ani Grik bhaxen Apol’lion, mhonngê nisontton korpi.

¹²Poilem noxtt oxem somplem; hachê magir anink don noxttam ieunchim asat.

¹³Uprant sovea devdutan apli tuturi vazoili ani Deva mukhar bhangarachi vedi asa ticheam konnxeantlean êk tallo ietalo to hanvem aikolo.

¹⁴“Vorixtt Eufrat nodi-xim char devdut sankllimnim bandlele asat tankam sôdd.”, oxem tea tallean tuturi gheun aslo tea sovea devdutak mhonn’lem.

¹⁵Team char devdutank sôddle; hea vorsachea hea mhoineachea hea disachea heach vorak mon’xakullacho tisro vantto jivexim marunk uddounk tankam Devan toiar korun dovorlele.

¹⁶Tanchem loskor kitlem aslem tem hanvem aikolem: don’xim lak ghoddesvar.

¹⁷Ani mhojea dorxonant ghodde ani tancher boslele ghoddesvar hanvem dekhle: tanchê chhatiek ujea vori korttim aslim, rotna vori nillim ani gondhoka vori hollduvim. Ghoddeancheô tokliô xinvancheam tokleam sarkeô asleô, ani tancheam tonddantlean bhair sortalo uzo, dhunvôr ani gondhok.

¹⁸Heam tin piddamnim — tancheam tonddantlean bhair sortalo to uzo, dhunvôr ani gondhok — mon’xakullacho tisro vantto marun uddoilo.

¹⁹Karonn ghoddeanchem boll tanchea tonddant ani toxench tancheam xempamnim asa, kiteak tancheô xempô sorpam sarkeô, ani tankam lokak mar ditat tosleô tokliô asat.

²⁰Heam piddamnim marinastana urlolo tea lokan apleanch hatancheam kamank patt korunk na, nhoi mhonn devcharank bhôzpachem soddunk na. Aikunk ani cholunk xokonant tosleam bhanga-racheam, rupeancheam, pitullcheam, fatracheam ani lankddacheam murtim-puttleanchi bhozônn tim korit ravlim.

²¹Toxench tãnnim aple khun, aple jadu, aplem pozoddponn ani apleô choriô-nagovnnô soddun diunk nant.