Read Gobaith i Gymru Genesis 11 Bible Online

Genesis 11 - Gobaith i Gymru bible

Genesis 11

¹Ar un adeg, un iaith oedd drwy'r byd i gyd. Roedd pawb yn defnyddio'r un geiriau.

²Pan oedd y bobl yn symud o le i le yn y dwyrain, dyma nhw'n dod i dir gwastad yn Babilonia [10] ac yn setlo yno.

³Ac medden nhw, “Gadewch i ni wneud brics wedi eu tanio'n galed i'w defnyddio i adeiladu.” (Roedden nhw'n defnyddio brics yn lle cerrig, a tar yn lle morter.)

⁴“Dewch,” medden nhw, “gadewch i ni adeiladu dinas fawr i ni'n hunain, gyda thŵr uchel yn estyn i fyny i'r nefoedd. Byddwn ni'n enwog, a fydd dim rhaid i ni gael ein gwasgaru drwy'r byd i gyd.”

⁵A dyma'r ARGLWYDD yn dod i lawr i edrych ar y ddinas a'r tŵr roedd y bobl yn eu hadeiladu.

⁶Ac meddai, “Maen nhw wedi dechrau gwneud hyn am eu bod nhw'n un bobl sy'n siarad yr un iaith. Does dim byd yn eu rhwystro nhw rhag gwneud beth bynnag maen nhw eisiau.

⁷Dewch, gadewch i ni fynd i lawr a chymysgu eu hiaith nhw, fel na fyddan nhw'n deall ei gilydd yn siarad.”

⁸Felly dyma'r ARGLWYDD yn eu gwasgaru nhw drwy'r byd i gyd, a dyma nhw'n stopio adeiladu'r ddinas.

⁹Roedd y ddinas yn cael ei galw yn Babel am mai dyna ble wnaeth yr ARGLWYDD gymysgu [11] ieithoedd pobl, a'u gwasgaru drwy'r byd i gyd.

¹⁰Dyma hanes teulu Shem: Pan oedd Shem yn gant oed, cafodd ei fab Arffacsad ei eni (Roedd hyn ddwy flynedd ar ôl y dilyw.)

¹¹Buodd Shem fyw am 500 mlynedd ar ôl i Arffacsad gael ei eni, a chafodd blant eraill.

¹²Pan oedd Arffacsad yn 35 oed, cafodd ei fab Shelach ei eni.

¹³Buodd Arffacsad fyw am 403 o flynyddoedd ar ôl i Shelach gael ei eni, a chafodd blant eraill.

¹⁴Pan oedd Shelach yn 30 oed, cafodd ei fab Eber ei eni.

¹⁵Buodd Shelach fyw am 403 o flynyddoedd ar ôl i Eber gael ei eni, a chafodd blant eraill.

¹⁶Pan oedd Eber yn 34 oed, cafodd ei fab Peleg ei eni.

¹⁷Buodd Eber fyw am 430 mlynedd ar ôl i Peleg gael ei eni, a chafodd blant eraill.

¹⁸Pan oedd Peleg yn 30 oed, cafodd ei fab Reu ei eni.

¹⁹Buodd Peleg fyw am 209 o flynyddoedd ar ôl i Reu gael ei eni, a chafodd blant eraill.

²⁰Pan oedd Reu yn 32 oed, cafodd ei fab Serwg ei eni.

²¹Buodd Reu fyw am 207 o flynyddoedd ar ôl i Serwg gael ei eni, a chafodd blant eraill.

²²Pan oedd Serwg yn 30 oed, cafodd ei fab Nachor ei eni.

²³Buodd Serwg fyw am 200 mlynedd ar ôl i Nachor gael ei eni, a chafodd blant eraill.

²⁴Pan oedd Nachor yn 29 oed, cafodd ei fab Tera ei eni.

²⁵Buodd Nachor fyw am 119 mlynedd ar ôl i Tera gael ei eni, a chafodd blant eraill.

²⁶Pan oedd Tera yn 70 oed, roedd ganddo dri mab — Abram, Nachor a Haran.

²⁷Dyma hanes teulu Tera: Tera oedd tad Abram, Nachor a Haran. Haran oedd tad Lot.

²⁸Pan fuodd Haran farw, yn Ur yn Babilonia [12] lle cafodd ei eni, roedd ei dad Tera yn dal yn fyw.

²⁹Priododd y ddau frawd arall. Sarai oedd enw gwraig Abram, a Milca oedd enw gwraig Nachor (Roedd hi'n un o ferched Haran, ac enw ei chwaer oedd Isca.)

³⁰Roedd Sarai yn methu cael plant.

³¹Dyma Tera yn gadael Ur yn Babilonia gyda'r bwriad o symud i wlad Canaan. Aeth ag Abram ei fab gydag e, hefyd Sarai ei ferch-yng-nghyfraith a Lot ei ŵyr (sef mab Haran). Ond dyma nhw'n cyrraedd Haran ac yn setlo yno.

³²Dyna lle buodd Tera farw, yn 205 oed.