Read Gobaith i Gymru Genesis 49 Bible Online

Genesis 49 - Gobaith i Gymru bible

Genesis 49

¹Galwodd Jacob ei feibion ato. “Dewch yma i mi gael dweud wrthoch chi beth sy'n mynd i ddigwydd i chi yn y dyfodol,” meddai.

²“Dewch yma i wrando, feibion Jacob; gwrandwch ar Israel, eich tad.

³Reuben, ti ydy fy mab hynaf; fy nghryfder, a ffrwyth cyntaf fy egni — yr un â'r safle uchaf a'r anrhydedd mwyaf.

⁴Ond rwyt ti mor afreolus â dŵr — fyddi di ddim yn gyntaf. Est ti i mewn i wely dy dad, a'i lygru trwy dreisio fy ngwraig — gorwedd ar glustogau dy dad!

⁵Mae Simeon a Lefi yn frodyr. Dyma nhw'n cytuno i ddefnyddio arfau treisiol.

⁶Dw i ddim eisiau bod yn rhan o'r peth — dw i am gadw draw o'r math yna o feddwl. Roedden nhw wedi gwylltio, a dyma nhw'n lladd dynion fel rhai'n gwneud ychen yn gloff am hwyl.

⁷Melltith arnyn nhw am wylltio mor ofnadwy; am ddigio a bod mor greulon. Dw i'n mynd i wasgaru eu disgynyddion nhw ar hyd a lled Israel!

⁸Jwda, bydd dy frodyr yn dy ganmol di. Byddi di'n cael y llaw uchaf ar dy elynion. Bydd teulu dy dad yn ymgrymu'n isel o dy flaen di.

⁹Jwda, fy mab, rwyt ti fel llew ifanc wedi lladd dy brae ac yn sefyll uwch ei ben. Mae'n gorwedd i lawr eto fel llew, a does neb yn meiddio aflonyddu arno.

¹⁰Fydd y deyrnwialen ddim yn gadael Jwda. Bydd ffon y llywodraethwr gan ei ddisgynyddion nes daw pobl i dalu teyrnged iddo. Bydd pobl y gwledydd yn ufuddhau iddo.

¹¹Bydd yn rhwymo ei ebol wrth y winwydden, a'i asen ifanc wrth y winwydden orau. Bydd yn golchi ei ddillad mewn gwin a'i fantell yng ngwaed y grawnwin.

¹²Mae ei lygaid yn gochion gan win, a'i ddannedd yn wynion fel llaeth.

¹³Bydd Sabulon yn byw ar lan y môr. Bydd yn hafan ddiogel i longau. Bydd ei ffin yn ymestyn at Sidon.

¹⁴Mae Issachar fel asyn cryf yn gorwedd dan bwysau ei baciau.

¹⁵Gwelodd le da i orffwys a bod y wlad yno yn hyfryd. Felly plygodd i lawr i dderbyn baich ar ei gefn a chael ei hun yn gaethwas.

¹⁶Bydd Dan yn rheoli ei bobl fel un o lwythau Israel.

¹⁷Boed i Dan fod fel neidr ar ochr y ffordd — fel gwiber ar y llwybr yn brathu troed y ceffyl a gwneud i'r marchog syrthio yn ôl.

¹⁸Dw i'n edrych ymlaen at gael fy achub gen ti, o ARGLWYDD!

¹⁹Bydd ysbeilwyr yn ymosod ar Gad, ond bydd e'n troi ac yn eu gyrru nhw i ffwrdd.

²⁰Bydd bwyd cyfoethog gan Asher. Bydd e'n darparu danteithion i'r llys brenhinol.

²¹Mae Nafftali fel ewig yn rhedeg yn rhydd, sy'n cael llydnod hardd.

²²Mae Joseff yn gangen ffrwythlon — cangen ffrwythlon wrth ffynnon, a'i changhennau'n ymestyn dros y wal.

²³Roedd bwasaethwyr yn ymosod arno, yn saethu ato ac yn dal dig yn ei erbyn.

²⁴Ond daliai ei fwa'n llonydd ac roedd ei ddwylo a'i freichiau'n chwim. Roedd Un Cryf Jacob gydag e — y Bugail, Craig Israel.

²⁵Duw dy dad, yr un fydd yn dy helpu di; y Duw sy'n rheoli popeth. [109] Bydd e'n dy fendithio di gyda'r bendithion o'r awyr uchod, a'r bendithion sy'n gorwedd dan y ddaear isod, gyda bendithion y fron a'r groth.

²⁶Mae'r bendithion gafodd dy dad yn well na bendithion y mynyddoedd tragwyddol a'r pethau da mae'r bryniau hynafol yn eu rhoi. Byddan nhw'n disgyn ar ben Joseff — ar dalcen yr un sy'n flaenaf ar ei frodyr.

²⁷Mae Benjamin fel blaidd rheibus, yn rhwygo ei ysglyfaeth yn y bore, ac yn rhannu beth sydd ar ôl gyda'r nos.”

²⁸Dyma'r deuddeg llwyth yn Israel. A dyma beth ddwedodd eu tad wrthyn nhw pan fendithiodd nhw. Rhoddodd fendith addas i bob un ohonyn nhw.

²⁹Wedyn rhoddodd Jacob orchymyn iddyn nhw. “Dw i'n mynd i farw cyn hir [110]. Dw i eisiau i chi fy nghladdu gyda fy hynafiaid, yn yr ogof ar dir Effron yr Hethiad.

³⁰Yr ogof yn Machpela ger Mamre yng ngwlad Canaan. Yr un brynodd Abraham gan Effron yr Hethiad fel man claddu i'w deulu.

³¹Dyna lle mae Abraham a'i wraig Sara wedi eu claddu. Dyna lle mae Isaac a'i wraig Rebeca wedi eu claddu. A dyna lle gwnes i gladdu Lea.

³²Cafodd y darn tir a'r ogof sydd ynddo ei brynu gan yr Hethiaid.”

³³Pan oedd Jacob wedi gorffen dweud wrth ei feibion beth i'w wneud, cododd ei draed yn ôl ar y gwely, cymryd ei anadl olaf a marw.