Read Gobaith i Gymru Genesis 6 Bible Online

Genesis 6 - Gobaith i Gymru bible

Genesis 6

¹Wrth i boblogaeth y byd dyfu ac i ferched gael eu geni,

²dyma'r bodau nefol yn gweld fod merched dynol yn hardd. A dyma nhw'n cymryd y rhai roedden nhw'n eu ffansïo i fod yn wragedd iddyn nhw eu hunain.

³Yna dyma'r ARGLWYDD yn dweud, “Alla i ddim gadael i bobl fyw am byth. Maen nhw'n greaduriaid sy'n mynd i farw, ac o hyn ymlaen fyddan nhw ddim yn byw fwy na 120 mlynedd.”

⁴Roedd cewri yn byw ar y ddaear bryd hynny (ac wedyn hefyd). Nhw oedd y plant gafodd eu geni ar ôl i'r bodau nefol gael rhyw gyda merched dynol. Dyma arwyr enwog yr hen fyd.

⁵Roedd yr ARGLWYDD yn gweld bod y ddynoliaeth bellach yn ofnadwy o ddrwg. Doedden nhw'n meddwl am ddim byd ond gwneud drwg drwy'r amser.

⁶Roedd yr ARGLWYDD yn sori ei fod e wedi creu'r ddynoliaeth. Roedd wedi ei frifo a'i ddigio.

⁷Felly dyma fe'n dweud, “Dw i'n mynd i gael gwared â'r ddynoliaeth yma dw i wedi ei chreu. Ydw, a'r anifeiliaid, yr holl ymlusgiaid a phryfed a'r adar hefyd. Dw i'n sori mod i wedi eu creu nhw yn y lle cyntaf.”

⁸Ond roedd Noa wedi plesio'r ARGLWYDD.

⁹Dyma hanes Noa a'i deulu: Roedd Noa yn ddyn da — yr unig un bryd hynny oedd yn gwneud beth roedd Duw eisiau. Roedd ganddo berthynas agos gyda Duw.

¹⁰Roedd ganddo dri mab, sef Shem, Cham a Jaffeth.

¹¹Roedd y byd wedi ei sbwylio yng ngolwg Duw. Roedd trais a chreulondeb ym mhobman.

¹²Gwelodd Duw fod y byd wedi ei sbwylio go iawn. Roedd pawb yn gwneud drwg.

¹³Felly dyma Duw yn dweud wrth Noa, “Dw i wedi penderfynu bod rhaid i bawb gael eu dinistrio. Mae trais a chreulondeb ym mhobman, felly dw i'n mynd i'w dinistrio nhw, a'r byd hefo nhw.

¹⁴Dw i am i ti adeiladu arch, sef cwch mawr, wedi ei gwneud o goed goffer. Rhanna hi yn ystafelloedd a'i selio hi y tu mewn a'r tu allan â pyg.

¹⁵Gwna hi'n 130 metr o hyd, 22 metr o led ac 13 metr o uchder.

¹⁶Rho do ar yr arch, ond gad fwlch o 45 centimetr rhwng y to ac ochrau'r arch. Rho ddrws ar ochr yr arch, a thri llawr ynddi — yr isaf, y canol a'r uchaf.

¹⁷Dw i'n mynd i ddod â llifogydd ar y ddaear fydd yn boddi popeth sy'n anadlu. Bydd popeth byw yn marw.

¹⁸Ond bydda i'n gwneud ymrwymiad i ti. Byddi di'n mynd i mewn i'r arch — ti a dy feibion, dy wraig a'u gwragedd nhw.

¹⁹“Dw i am i ti fynd â dau o bob math o anifail i mewn i'r arch hefo ti i'w cadw'n fyw, sef un gwryw ac un benyw.

²⁰Pob math o adar, pob math o anifeiliaid, pob math o ymlusgiaid — bydd dau o bopeth yn dod atat ti i'w cadw'n fyw.

²¹Dos â phob math o fwyd gyda ti hefyd, a'i storio. Digon o fwyd i chi ac i'r anifeiliaid.”

²²A dyma Noa yn gwneud yn union fel roedd Duw wedi dweud wrtho.