Read Gobaith i Gymru Genesis 7 Bible Online

Genesis 7 - Gobaith i Gymru bible

Genesis 7

¹Dyma'r ARGLWYDD yn dweud wrth Noa, “Dos i mewn i'r arch gyda dy deulu. Ti ydy'r unig un sy'n gwneud beth dw i eisiau.

²Dos â saith pâr o bob anifail sy'n iawn i'w fwyta a'i aberthu, ac un pâr o bob anifail arall. Un gwryw ac un fenyw ym mhob pâr.

³Dos â saith pâr o bob aderyn gyda ti hefyd. Dw i eisiau i'r amrywiaeth o anifeiliaid ac adar oroesi ar y ddaear.

⁴Wythnos i heddiw dw i'n mynd i wneud iddi lawio. Bydd hi'n glawio nos a dydd am bedwar deg diwrnod. Dw i'n mynd i gael gwared â phopeth byw dw i wedi ei greu oddi ar wyneb y ddaear.”

⁵Dyma Noa yn gwneud yn union fel roedd yr ARGLWYDD wedi dweud wrtho.

⁶Roedd Noa yn 600 oed pan ddaeth y llifogydd a boddi'r ddaear.

⁷Aeth Noa a'i wraig a'i feibion a'u gwragedd nhw i mewn i'r arch i ddianc rhag y llifogydd.

⁸Dyma'r anifeiliaid gwahanol (y rhai oedd yn iawn i'w bwyta a'u haberthu, a'r lleill hefyd), a'r gwahanol fathau o adar a chreaduriaid bach eraill,

⁹yn dod at Noa i'r arch bob yn bâr — gwryw a benyw. Digwyddodd hyn yn union fel roedd Duw wedi dweud wrth Noa.

¹⁰Wythnos union wedyn dyma'r llifogydd yn dod ac yn boddi'r ddaear.

¹¹Pan oedd Noa yn 600 mlwydd oed, ar yr ail ar bymtheg o'r ail fis, byrstiodd y ffynhonnau dŵr tanddaearol, ac agorodd llifddorau'r awyr.

¹²Buodd hi'n bwrw glaw yn drwm, ddydd a nos, am bedwar deg diwrnod.

¹³Ar y diwrnod y dechreuodd hi lawio, aeth Noa i'r arch gyda'i wraig, ei feibion, Shem, Cham a Jaffeth, a'u gwragedd nhw.

¹⁴Gyda nhw roedd y gwahanol fathau o anifeiliaid, gwyllt a dof, ymlusgiaid, adar a phryfed — popeth oedd yn gallu hedfan.

¹⁵Aeth y creaduriaid byw i gyd at Noa i'r arch bob yn ddau —

¹⁶gwryw a benyw, yn union fel roedd Duw wedi dweud wrth Noa. A dyma'r ARGLWYDD yn eu cau nhw i mewn.

¹⁷Dyma'r dilyw yn para am bedwar deg diwrnod. Roedd y llifogydd yn mynd yn waeth, nes i'r arch gael ei chodi ar wyneb y dŵr.

¹⁸Roedd y dŵr yn codi'n uwch ac yn uwch, a'r arch yn nofio ar yr wyneb.

¹⁹Roedd cymaint o ddŵr nes bod hyd yn oed y mynyddoedd o'r golwg.

²⁰Daliodd i godi nes bod y dŵr dros saith metr yn uwch na'r mynyddoedd uchaf

²¹Cafodd popeth byw ei foddi — adar, anifeiliaid dof a gwyllt, yr holl greaduriaid sy'n heidio ar y ddaear, a phob person byw.

²²Roedd pob creadur oedd yn anadlu ac yn byw ar dir sych wedi marw.

²³Dyma Duw yn cael gwared â nhw i gyd — pobl, anifeiliaid, ymlusgiaid a phryfed, ac adar. Cafodd wared â'r cwbl. Dim ond Noa a'r rhai oedd yn yr arch oedd ar ôl.

²⁴Wnaeth y dŵr ddim dechrau gostwng am 150 diwrnod.