Read Gobaith i Gymru 1 Brenhinoedd 4 Bible Online

1 Brenhinoedd 4 - Gobaith i Gymru bible

1 Brenhinoedd 4

¹Roedd Solomon yn frenin ar Israel gyfan.

²Dyma ei swyddogion: Asareia fab Sadoc oedd yr offeiriad.

³Elichoreff ac Achïa, meibion Shisha, oedd ei ysgrifenyddion. Jehosaffat fab Achilwd oedd y cofnodydd swyddogol.

⁴Benaia fab Jehoiada oedd pennaeth y fyddin, a Sadoc ac Abiathar yn offeiriaid.

⁵Asareia fab Nathan oedd pennaeth swyddogion y rhanbarthau; yna Sabwd fab Nathan yn offeiriad ac yn gynghorwr agos i'r brenin.

⁶Achishar oedd yn rhedeg y palas a gofalu am holl eiddo'r brenin, ac Adoniram fab Afda oedd swyddog y gweithlu gorfodol.

⁷Roedd gan Solomon ddeuddeg swyddog rhanbarthol dros wahanol ardaloedd yn Israel. Roedden nhw'n gyfrifol am ddarparu bwyd i'r brenin a'i lys — pob un yn gyfrifol am un mis y flwyddyn.

⁸Dyma'u henwau nhw: Ben-chŵr: ar fryniau Effraim;

⁹Ben-decar: yn Macats, Shaalfîm, Beth-shemesh ac Elon-beth-chanan;

¹⁰Ben-chesed: yn Arwboth (roedd ei ardal e'n cynnwys Socho a holl ardal Cheffer);

¹¹Ben-abinadab: yn Naffath-dor i gyd (roedd e wedi priodi Taffath, merch Solomon);

¹²Baana fab Achilwd: yn Taanach, Megido a'r rhan o Beth-shean sydd wrth ymyl Sarethan, o dan Jesreel. Roedd ei ardal yn mynd o Beth-shean hyd at Abel-mechola a'r tu hwnt i Jocmeam;

¹³Ben-geber: yn Ramoth-gilead. Roedd ei ardal e'n cynnwys gwersylloedd Jair mab Manasse, yn Gilead, ac ardal Argob yn Bashan oedd yn cynnwys chwe deg o drefi mawr, pob un gyda waliau cadarn a barrau pres ar eu giatiau;

¹⁴Achinadab fab Ido: yn Machanaîm;

¹⁵Achimaats: yn Nafftali (fe wnaeth briodi Basemath, merch Solomon);

¹⁶Baana fab Chwshai: yn Asher ac yn Aloth;

¹⁷Jehosaffat fab Parŵach: yn Issachar;

¹⁸Shimei fab Ela: yn Benjamin;

¹⁹a Geber fab Wri: yn ardal Gilead (sef y wlad oedd yn perthyn ar un adeg i Sihon brenin yr Amoriaid ac Og brenin Bashan). Fe oedd yr unig swyddog yn y rhanbarth hwnnw i gyd.

²⁰Roedd poblogaeth fawr yn Jwda ac Israel, roedd pobl fel y tywod ar lan y môr, ond roedd ganddyn nhw ddigon i'w fwyta a'i yfed, ac roedden nhw'n hapus.

²¹Roedd Solomon yn llywodraethu ar yr holl ardaloedd o Afon Ewffrates i wlad y Philistiaid ac i lawr at y ffin gyda'r Aifft. Roedd y teyrnasoedd yma i gyd yn talu trethi iddo, ac yn gwasanaethu Solomon ar hyd ei oes.

²²Dyma beth oedd ei angen ar lys Solomon bob dydd: tri deg mesur o'r blawd gorau chwe deg mesur o flawd cyffredin,

²³deg o loi wedi eu pesgi, dau ddeg o loi oedd allan ar y borfa, a cant o ddefaid. Roedd hyn heb sôn am y ceirw, gaseliaid, iyrchod a gwahanol fathau o ffowls.

²⁴Achos roedd y llys brenhinol mor fawr — roedd yn rheoli'r holl ardaloedd i'r gorllewin o Tiffsa ar lan Afon Ewffrates i lawr i Gasa, ac roedd heddwch rhyngddo â'r gwledydd o'i gwmpas.

²⁵Pan oedd Solomon yn fyw, roedd pawb yn Jwda ac Israel yn teimlo'n saff. Roedd gan bawb, o Dan yn y gogledd i Beersheba [12] yn y de, gartref a thir i allu mwynhau cynnyrch eu gwinwydd a'u coed ffigys.

²⁶Roedd gan Solomon stablau i ddal pedwar deg mil o geffylau cerbyd, ac roedd ganddo un deg dau o filoedd o farchogion.

²⁷Roedd y swyddogion rhanbarthol yn darparu bwyd ar gyfer y Brenin Solomon a phawb yn ei lys. Roedd pob un yn gyfrifol am fis, ac yn gwneud yn siŵr nad oedd y llys yn brin o ddim.

²⁸Roedd gan bob un hefyd stablau penodol i fynd â haidd a gwellt iddyn nhw i'w roi i'r ceffylau a'r meirch.

²⁹Roedd Duw wedi rhoi doethineb a deall eithriadol i Solomon. Roedd ei wybodaeth yn ddiddiwedd, fel y tywod ar lan y môr.

³⁰Roedd yn fwy doeth nag unrhyw un o ddynion doeth y dwyrain a'r Aifft.

³¹Doedd neb doethach nag e. Roedd yn ddoethach nac Ethan yr Esrachiad, Heman hefyd, a Calcol a Darda, meibion Machol. Roedd yn enwog drwy'r gwledydd o'i gwmpas i gyd.

³²Roedd wedi llunio tair mil o ddiarhebion a chyfansoddi mil a phump o ganeuon.

³³Roedd yn gallu siarad am blanhigion, o'r coed cedrwydd mawr yn Libanus i'r isop sy'n tyfu ar waliau. Roedd hefyd yn gallu traethu am anifeiliaid, adar, ymlusgiaid a phryfed a physgod.

³⁴Roedd brenhinoedd y gwledydd i gyd i yn anfon pobl at Solomon i wrando ar ei ddoethineb.