Read Gobaith i Gymru Exodus 15 Bible Online

Exodus 15 - Gobaith i Gymru bible

Exodus 15

¹Dyma Moses a pobl Israel yn canu'r gân yma i'r ARGLWYDD: “Dw i am ganu i'r ARGLWYDD a dathlu ei fuddugoliaeth: Mae e wedi taflu'r ceffylau a'u marchogion i'r môr!

²Yr ARGLWYDD sy'n rhoi nerth a chân i mi! Fe sydd wedi fy achub i. Dyma'r Duw dw i'n ei addoli — Duw fy nhad, a dw i'n mynd i'w ganmol!

³Yr ARGLWYDD ydy ei enw e. Mae'r ARGLWYDD yn rhyfelwr.

⁴Mae wedi taflu cerbydau y Pharo a'i fyddin i gyd i'r môr! Cafodd eu swyddogion gorau eu boddi yn y Môr Coch. [11]

⁵Daeth y dŵr dwfn drostyn nhw, a dyma nhw'n suddo i'r gwaelod fel carreg.

⁶Mae dy law gref yn rhyfeddol, ARGLWYDD; dy law gref di wnaeth ddryllio'r gelyn.

⁷Am dy fod mor aruthrol fawr, rwyt ti'n bwrw i lawr y rhai sy'n codi yn dy erbyn — Ti'n dangos dy fod yn ddig, ac maen nhw'n cael eu difa fel bonion gwellt.

⁸Wrth i ti chwythu dyma'r dŵr yn codi'n bentwr, y llif yn sefyll fel argae, a'r dŵr dwfn wedi caledu yng nghanol y môr.

⁹Dyma'r gelyn yn dweud, ‘Ar eu holau nhw! Dalia i nhw, a rhannu'r ysbail! Dw i'n mynd i gael amser da! Fydd neb ar ôl i'r cleddyf ei daro — dw i'n mynd i'w dinistrio nhw'n llwyr!’

¹⁰Ond dyma ti'n chwythu, a dyma'r môr yn llifo drostyn nhw! Dyma nhw'n suddo fel plwm yn y tonnau gwyllt!

¹¹Pa un o'r duwiau sy'n debyg i ti, ARGLWYDD? Does neb tebyg i ti — mor wych, ac mor sanctaidd, yn haeddu dy barchu a dy foli; ti'n gwneud gwyrthiau rhyfeddol!

¹²Dyma ti'n codi dy law gref a dyma'r ddaear yn llyncu'r gelyn!

¹³Yn dy gariad byddi'n arwain y bobl rwyt wedi eu rhyddhau; byddi'n eu tywys yn dy nerth i'r lle cysegredig lle rwyt yn byw.

¹⁴Bydd y bobloedd yn clywed ac yn crynu — bydd pobl Philistia yn poeni,

¹⁵ac arweinwyr Edom wedi brawychu. Bydd dynion cryf Moab yn crynu, a pobl Canaan yn poeni.

¹⁶Bydd ofn a braw yn dod drostyn nhw — mae dy gryfder di yn eu gwneud yn fud fel carreg. Fyddan nhw'n gwneud dim nes bydd dy bobl wedi pasio heibio, ARGLWYDD; y bobl wnest ti eu prynu wedi pasio heibio.

¹⁷Ond byddi'n mynd â nhw i mewn ac yn eu plannu ar dy fynydd dy hun — ble rwyt ti wedi dewis byw, ARGLWYDD; y cysegr rwyt ti wedi ei sefydlu.

¹⁸Yr ARGLWYDD sy'n teyrnasu am byth bythoedd!

¹⁹Pan aeth ceffylau y Pharo, a'i gerbydau a'i filwyr i'r môr, dyma'r ARGLWYDD yn gwneud i ddŵr y môr lifo'n ôl drostyn nhw. Ond roedd pobl Israel wedi cerdded ar dir sych drwy ganol y môr.”

²⁰Yna dyma Miriam y broffwydes, chwaer Aaron, yn gafael mewn drwm llaw, a dyma'r merched i gyd yn codi drymiau a mynd ar ei hôl gan ddawnsio.

²¹A dyma Miriam yn canu'r gytgan: “Canwch i'r ARGLWYDD i ddathlu ei fuddugoliaeth! Mae e wedi taflu'r ceffylau a'u marchogion i'r môr!”

²²Dyma Moses yn cael pobl Israel i symud ymlaen oddi wrth y Môr Coch. Dyma nhw'n mynd allan i Anialwch Shwr. Buon nhw'n cerdded yn yr anialwch am dri diwrnod heb ddod o hyd i ddŵr.

²³Yna dyma nhw'n cyrraedd Mara, ond roedden nhw'n methu yfed y dŵr yno am ei fod mor chwerw. (Dyna pam roedd yn cael ei alw yn Mara — sef “Chwerw.”)

²⁴Dyma'r bobl yn dechrau troi yn erbyn Moses. “Beth ydyn ni'n mynd i'w yfed?” medden nhw.

²⁵Dyma Moses yn gweddïo'n daer am help, a dyma'r ARGLWYDD yn ei arwain at ddarn o bren. Ar ôl i Moses ei daflu i'r dŵr roedd y dŵr yn iawn i'w yfed. Yn Mara dyma'r ARGLWYDD yn rhoi rheol iddyn nhw, er mwyn profi pa mor ffyddlon oedden nhw:

²⁶“Os byddwch chi'n ufudd i'r ARGLWYDD eich Duw, a gwneud beth sy'n iawn yn ei olwg e, gwrando ar beth mae'n ei ddweud a chadw at ei reolau, fydd dim rhaid i chi ddiodde'r afiechydon wnes i daro'r Eifftiaid gyda nhw. Fi ydy'r ARGLWYDD sy'n eich iacháu chi.”

²⁷Yna dyma nhw'n cyrraedd Elim, lle roedd un deg dwy o ffynhonnau a saith deg o goed palmwydd. A dyma nhw'n gwersylla yno wrth ymyl y ffynhonnau.