Read Gobaith i Gymru Exodus 26 Bible Online

Exodus 26 - Gobaith i Gymru bible

Exodus 26

¹“Mae'r Tabernacl ei hun i gael ei wneud o ddeg llen o'r lliain main gorau, gyda lluniau o geriwbiaid wedi eu dylunio'n gelfydd a'u brodio gydag edau las, porffor a coch.

²Mae pob llen i fod yn un deg dau metr o hyd a dau fetr o led — i gyd yr un faint.

³Mae pump o'r llenni i gael eu gwnïo at ei gilydd, a'r pump arall yr un fath.

⁴Yna gwneud dolenni o edau las ar hyd ymyl llen olaf pob set —

⁵hanner cant o ddolenni ar bob un, fel eu bod gyferbyn a'i gilydd.

⁶Wedyn gwneud hanner can bachyn aur i ddal y llenni at ei gilydd, fel bod y cwbl yn un darn.

⁷“Yna nesaf gwneud llenni o flew gafr i fod fel pabell dros y Tabernacl — un deg un ohonyn nhw.

⁸Mae pob llen i fod yn un deg tri metr o hyd a dau fetr o led — i gyd yr un faint.

⁹Mae pump o'r llenni i gael eu gwnïo at ei gilydd, a'r chwech arall i gael eu gwnïo at ei gilydd. Mae'r chweched llen yn yr ail grŵp o lenni, i'w phlygu drosodd i wneud mynedfa ar du blaen y babell.

¹⁰Yna gwneud hanner can dolen ar hyd ymyl llen olaf pob set,

¹¹a hanner can bachyn pres i fynd trwy'r dolenni i ddal y llenni at ei gilydd, a gwneud y cwbl yn un darn.

¹²Mae'r hanner llen sydd dros ben i'w adael yn hongian dros gefn y Tabernacl.

¹³Yna ar ddwy ochr y Tabernacl bydd yr hanner metr ychwanegol yn golygu fod y darn sy'n hongian dros yr ymyl yn ei gorchuddio hi i'r llawr.

¹⁴“Yna'n olaf, dau orchudd arall dros y cwbl — un wedi ei wneud o grwyn hyrddod wedi eu llifo'n goch, a gorchudd allanol o grwyn môr-fuchod.

¹⁵“Mae fframiau'r Tabernacl i'w gwneud allan o goed acasia.

¹⁶Mae pob un i fod yn bedwar metr o hyd, a chwe deg chwech centimetr o led,

¹⁷gyda dau denon ar bob un i'w cysylltu â'i gilydd.

¹⁸Rhaid gwneud dau ddeg ffrâm i ochr ddeheuol y Tabernacl,

¹⁹a pedwar deg soced arian i ddal y fframiau — dwy soced i'r ddau denon ar bob ffrâm.

²⁰Wedyn dau ddeg ffrâm ar ochr arall y Tabernacl, sef yr ochr ogleddol.

²¹A pedwar deg soced iddyn nhw — dwy soced dan bob ffrâm.

²²Yna chwe ffrâm i gefn y Tabernacl, sef y pen gorllewinol,

²³a dau ffrâm ychwanegol i'r corneli yn y cefn.

²⁴Yn y corneli mae dau ffrâm yn ffitio gyda'i gilydd ar y gwaelod, ac yn cael eu dal gyda'i gilydd gan gylch ar y top. Mae'r fframiau ar y ddwy gornel i fod yr un fath.

²⁵Mae hynny'n gwneud wyth ffrâm gydag un deg chwech o socedi arian — dwy soced dan bob ffrâm.

²⁶ [26-27] “Yna rwyt i wneud croesfarrau o goed acasia — pump i'r fframiau bob ochr i'r Tabernacl, a pump i fframiau cefn y Tabernacl sy'n wynebu'r gorllewin.

²⁸Mae'r croesfar ar ganol y fframiau i ymestyn o un pen i'r llall.

²⁹Mae'r fframiau a'r croesfarrau i gael eu gorchuddio gydag aur, ac mae'r cylchoedd sy'n dal y croesfarrau i gael eu gwneud o aur hefyd.

³⁰“Pan fyddi'n codi'r Tabernacl, rhaid dilyn yr union fanylion gafodd eu rhoi i ti ar y mynydd.

³¹“Rwyt i wneud llen arbennig o'r lliain main gorau, gyda lluniau o geriwbiaid wedi eu dylunio'n gelfydd a'u brodio gydag edau las, porffor a coch.

³²Mae'r llen yma i hongian ar bedwar polyn o goed acasia, wedi eu gorchuddio gydag aur a'u gosod mewn socedi arian.

³³Mae'r llen i hongian ar fachau aur, ac wedyn mae Arch y dystiolaeth i'w gosod tu ôl i'r llen. Bydd y llen yn gwahanu'r Lle Sanctaidd oddi wrth y Lle Mwyaf Sanctaidd.

³⁴Yna mae'r caead i gael ei osod ar Arch y dystiolaeth yn y Lle Mwyaf Sanctaidd.

³⁵Wedyn mae'r bwrdd a'r menora (sef y stand i'r lampau) i gael eu gosod gyferbyn â'i gilydd tu allan i'r llen — y bwrdd ar ochr y gogledd, a'r menora ar ochr y de.

³⁶Wedyn rhaid gwneud sgrîn ar gyfer y fynedfa i'r babell. Bydd hon eto wedi ei gwneud o'r lliain main gorau, ac wedi ei brodio gydag edau las, porffor a coch.

³⁷Mae i hongian ar bump polyn o goed acasia, wedi eu gorchuddio gydag aur. Mae'r bachau i'w gwneud o aur, ac mae pum soced bres i gael eu gwneud i ddal y polion.