Read Gobaith i Gymru Exodus 37 Bible Online

Exodus 37 - Gobaith i Gymru bible

Exodus 37

¹Yna dyma Betsalel yn gwneud yr Arch allan o goed acasia. Roedd hi'n 110 centimetr o hyd, 66 centimetr o led a 66 centimetr o uchder.

²Gorchuddiodd hi gyda haen o aur pur (y tu mewn a'r tu allan), a gosod border aur o'i chwmpas i'w haddurno.

³Yna gwneud pedwar cylch aur, a'u gosod nhw ar draed y gist, dwy bob ochr.

⁴Yna gwneud polion o goed acasia wedi eu gorchuddio gydag aur,

⁵a rhoi'r polion drwy'r cylchoedd bob ochr i'r Arch, i'w defnyddio i'w chario hi.

⁶Wedyn dyma fe'n gwneud caead o aur pur i'r Arch — 110 centimetr o hyd, a 66 centimetr o led.

⁷Yna gwneud dau geriwb o aur wedi ei guro (gwaith morthwyl) — un bob pen i'r caead,

⁸yn un darn gyda'r caead ei hun.

⁹Roedd adenydd y ceriwbiaid ar led yn cysgodi dros gaead yr Arch. Roedd y ceriwbiaid yn wynebu ei gilydd ac yn edrych i lawr ar y caead.

¹⁰Wedyn dyma fe'n gwneud y bwrdd o goed acasia — 88 centimetr o hyd, 44 centimetr o led, a 66 centimetr o uchder.

¹¹Gorchuddiodd e gydag aur pur, a gosod border aur o'i gwmpas i'w addurno.

¹²Yna gwneud croeslath 75 milimetr o drwch o'i gwmpas — hwnnw hefyd wedi ei addurno yr un fath â'r border.

¹³Yna gwnaeth bedwar cylch aur, a'i gosod nhw ar bedair cornel y bwrdd lle mae'r coesau

¹⁴wrth ymyl y croeslath. Roedd y cylchoedd ar gyfer rhoi'r polion trwyddyn nhw i gario'r bwrdd.

¹⁵Yna gwnaeth y polion o goed acasia a'u gorchuddio nhw gydag aur.

¹⁶Yna gwnaeth y llestri oedd ar y bwrdd allan o aur pur — y platiau, pedyll, jygiau a powlenni, i dywallt yr offrymau o ddiod.

¹⁷Yna dyma fe'n gwneud y menora (sef y stand i ddal y lampau) allan o aur pur — gwaith morthwyl, sef aur wedi ei guro. Mae'r cwbl i fod yn un darn — y droed, y goes, a'r cwpanau siâp blodyn gyda calycs oddi tanyn nhw.

¹⁸Roedd chwe cangen yn ymestyn allan o ochrau'r menora, tair bob ochr.

¹⁹Roedd tair cwpan siâp blodyn almon ar bob cangen — pob blodyn gyda calycs a petalau.

²⁰Ac ar brif goes y menora, pedair cwpan siâp blodyn almon gyda calycs a petalau.

²¹Un dan y pâr cyntaf o ganghennau, un dan yr ail, ac un dan y trydydd.

²²Roedd y cwbl wedi ei wneud o un darn o aur pur wedi ei guro — gwaith morthwyl.

²³Yna gwnaeth ei saith lamp, ei gefeiliau a'i phadellau o aur pur.

²⁴Defnyddiodd 35 cilogram o aur pur i wneud y menora a'r offer oedd gyda hi i gyd.

²⁵Yna dyma fe'n gwneud yr allor i losgi arogldarth. Gwnaeth hi o goed acasia, yn 45 centimetr sgwâr ac yn 90 centimetr o uchder. Roedd y cyrn arni yn un darn gyda'r allor ei hun.

²⁶Yna gorchuddiodd hi i gyd gyda haen o aur pur — y top, yr ochrau a'r cyrn. A gosod border aur o'i chwmpas i'w haddurno.

²⁷Roddodd ddau gylch aur ar y ddwy ochr iddi, gyferbyn â'i gilydd o dan y border, i roi'r polion trwyddyn nhw i gario'r allor.

²⁸Yna gwnaeth y polion o goed acasia, a'u gorchuddio nhw gydag aur.

²⁹Wedyn gwnaeth yr olew eneinio cysegredig a'r arogldarth persawrus, wedi ei wneud gan arbenigwr yn y grefft o wneud persawr.