Read Gobaith i Gymru Job 10 Bible Online

Job 10 - Gobaith i Gymru bible

Job 10

¹Mae'n gas gen i orfod byw! Ydw, dw i'n mynd i gwyno, a dweud mor chwerw dw i'n teimlo.

²Dweud wrth Dduw, ‘Paid condemnio fi heb achos! Gad i mi wybod pam ti'n ymosod arna i.’

³Wyt ti'n mwynhau cam-drin pobl? Taflu i ffwrdd waith dy ddwylo, a gwenu ar gynlluniau pobl ddrwg?

⁴Wyt ti'n edrych ar bethau trwy lygaid dynol? Wyt ti'n deall pethau fel mae pobl yn eu gweld nhw?

⁵Ydy dy fywyd di mor fyr â bywyd rhywun meidrol? Ydy dy flynyddoedd di'n mynd heibio fel ein blynyddoedd ni?

⁶Ai dyna pam ti'n chwilio am fy meiau i a cheisio dod o hyd i'm pechod?

⁷Ti'n gwybod yn iawn nad ydw i'n euog, ond all neb fy achub o dy ddwylo di.

⁸Dy ddwylo di wnaeth fy naddu i a'm creu, ond yna dyma ti'n troi i'm dinistrio'n llwyr!

⁹Cofia mai ti wnaeth fy siapio i fel clai. Wyt ti'n mynd i wneud llwch ohono i eto?

¹⁰Ti dywalltodd fi fel llaeth i'r groth, a'm ceulo fel caws ym mol fy mam.

¹¹Gwisgaist fi â chnawd a chroen, a gweu fy esgyrn a'm gewynnau at ei gilydd.

¹²Ti roddodd fywyd i mi, a gofalu amdana i — dy ofal di sydd wedi fy nghadw i'n fyw.

¹³Ond roeddet ti'n cuddio dy gynllun go iawn. Dw i'n gwybod mai dyma oedd dy fwriad:

¹⁴Fy ngwylio i, i weld fyddwn i'n pechu, ac wedyn gwrthod gadael i mi fynd.

¹⁵Os ydw i'n euog — mae ar ben arna i! Ond hyd yn oed os ydw i'n ddieuog, alla i ddim codi fy mhen; dw i'n llawn cywilydd ac wedi cael llond bol o ofid.

¹⁶Os coda i fy mhen, rwyt yn fy hela fel llew, i ddangos dy hun yn rhyfeddol — a hynny ar fy nhraul i!

¹⁷Ti'n galw tystion newydd yn fy erbyn, ac yn troi'n fwy a mwy dig gyda mi; dod â byddin newydd yn fy erbyn o hyd.

¹⁸Felly pam wnest ti adael i mi ddod allan o'r groth? Pam wnes i ddim marw bryd hynny, cyn i neb fy ngweld i? —

¹⁹Byddai'n braf petawn i erioed wedi bodoli. Neu wedi cael fy nghario o'r groth i'r bedd!

²⁰Mae fy nyddiau i mor brin, felly stopia! Gad lonydd i mi, i mi gael ychydig o gysur!

²¹Cyn i mi fynd — heb fyth ddod yn ôl — i wlad y twyllwch dudew,

²²i dir y gwyll a'r fagddu, lle does ond cysgodion ac anhrefn, a lle mae'r golau ei hun fel tywyllwch.”