Read Gobaith i Gymru Job 11 Bible Online

Job 11 - Gobaith i Gymru bible

Job 11

¹A dyma Soffar o Naäma yn ymateb:

²“Mae'n rhaid ateb y malu awyr diddiwedd yma! Ydy siarad di-baid yn gwneud rhywun yn iawn?

³Wyt ti'n meddwl fod dy barablu di yn mynd i dewi dynion? Oes neb yn mynd i dy geryddu di am dy siarad gwawdlyd?

⁴Ti'n dweud, ‘Mae beth dw i'n gredu yn iawn, a dw i'n lân yn dy olwg di, O Dduw.’

⁵O na fyddai Duw yn dweud rhywbeth, yn dy ateb di drosto'i hun,

⁶ac yn dangos i ti beth ydy doethineb go iawn! Mae dwy ochr i bob stori! Byddet ti'n gweld fod Duw yn dy gosbi lai nag wyt ti'n ei haeddu!

⁷Wyt ti'n meddwl dy fod yn deall hanfod Duw? Wyt ti wedi darganfod ffiniau i allu'r Un sy'n rheoli popeth?

⁸Mae'n uwch na'r nefoedd — beth alli di ei wneud? Mae'n ddyfnach nag Annwn [10] — beth wyt ti'n ei wybod?

⁹Mae'n fwy na'r ddaear ac yn lletach na'r môr.

¹⁰Os ydy Duw'n dod heibio ac arestio rhywun, a mynd ag e i'r llys, pwy sy'n gallu ei rwystro?

¹¹Achos mae e'n nabod y rhai sy'n twyllo; pan mae'n gweld drygioni, mae'n delio ag e.

¹²Ond mae mor amhosib i ddyn dwl droi'n ddoeth ag ydy hi i asyn gwyllt gael ei eni'n ddof!

¹³Os gwnei di droi at Dduw, ac estyn dy ddwylo ato mewn gweddi —

¹⁴troi cefn ar y drwg rwyt ti wedi ei wneud, a pheidio rhoi lle i anghyfiawnder —

¹⁵yna byddi'n dal dy ben yn uchel, heb gywilydd, ac yn gallu sefyll yn gadarn, heb ofn.

¹⁶Byddi'n anghofio dy holl drybini — bydd fel dŵr wedi mynd dan y bont.

¹⁷Bydd bywyd yn brafiach na chanol dydd, a'r adegau mwyaf tywyll yn olau fel y bore!

¹⁸Byddi'n teimlo'n saff, am fod gen ti obaith; yn edrych o dy gwmpas ac yn gorffwys yn ddiogel.

¹⁹Byddi'n gorwedd i lawr, heb angen bod ofn; a bydd llawer yn ceisio ennill dy ffafr.

²⁰Ond fydd pobl ddrwg yn gweld dim o hyn. Does dim dianc iddyn nhw! Eu hunig obaith fydd cael marw.”