Read Gobaith i Gymru Job 12 Bible Online

Job 12 - Gobaith i Gymru bible

Job 12

¹Dyma Job yn ateb:

²“Mae'n amlwg eich bod chi'n bobl mor bwysig! Fydd doethineb ddim yn bod ar ôl i chi fynd!

³Ond mae gen innau feddwl hefyd — dw i ddim gwaeth na chi. Mae pawb yn gwybod y pethau yna!

⁴Ond dw i wedi troi yn destun sbort i'm ffrindiau — ie fi, oedd yn galw ar Dduw ac yn cael ateb. Fi, y dyn da a gonest — yn destun sbort!

⁵Mae pobl gyfforddus eu byd yn wfftio fy helyntion — ‘Dyna sy'n digwydd pan mae dyn yn llithro!’

⁶Ond mae lladron yn cael bywyd braf, a'r rhai sy'n herio Duw yn byw yn saff — ac yn cario eu duw yn eu dwylo!

⁷Ond meddwch chi: ‘Gofyn i'r anifeiliaid — byddan nhw'n dy ddysgu; neu i'r adar — byddan nhw'n dweud wrthot ti.

⁸Neu gofyn i'r ddaear — bydd hi'n dy ddysgu, ac i bysgod y môr ddangos y ffordd i ti.

⁹Pa un ohonyn nhw sydd ddim yn gwybod mai Duw sydd wedi gwneud hyn?

¹⁰Yn ei law e mae bywyd pob creadur ac anadl pob person byw.

¹¹Ydy'r glust ddim yn profi geiriau fel mae'r geg yn blasu bwyd?

¹²Onid pobl mewn oed sy'n ddoeth, a'r rhai sydd wedi byw'n hir sy'n deall?’

¹³Duw ydy'r un doeth a chryf; ganddo fe y mae cyngor a deall.

¹⁴Does dim ailadeiladu beth mae e wedi ei chwalu; na dianc i'r sawl mae e wedi ei garcharu.

¹⁵Pan mae'n dal y glawogydd yn ôl, mae sychder yn dilyn; Pan mae e'n eu gollwng yn rhydd, maen nhw'n boddi'r tir.

¹⁶Duw ydy'r un cryf a medrus; mae'r un sydd ar goll a'r un sy'n camarwain yn atebol iddo.

¹⁷Mae'n arwain cynghorwyr i ffwrdd yn noeth, ac yn gwneud i farnwyr edrych fel ffyliaid.

¹⁸Mae'n tynnu gwisg brenhinoedd oddi arnyn nhw, ac yn rhwymo gwisg caethwas amdanyn nhw.

¹⁹Mae'n arwain offeiriaid i ffwrdd yn noeth, ac yn bwrw swyddogion y deml i lawr.

²⁰Mae'n cau cegau'r cynghorwyr ffyddlon, ac yn diddymu cyngor y dynion doeth.

²¹Mae'n dwyn anfri ar y bobl fawr, ac yn diarfogi'r rhyfelwr cryf.

²²Mae'n datguddio pethau dirgel y tywyllwch, ac yn dod â phethau tywyll i'r golau.

²³Mae'n gwneud i wledydd dyfu, ac yna'n eu dinistrio; Mae'n estyn ffiniau'r gwledydd ac yna'n eu chwalu.

²⁴Mae'n gwneud i arweinwyr y bobl fynd o'u pwyll, ac yn eu gadael i grwydro mewn anialwch heb lwybrau;

²⁵Yn ymbalfalu heb olau yn y tywyllwch, ac yn sigledig ar eu traed fel meddwon.