Read Gobaith i Gymru Job 13 Bible Online

Job 13 - Gobaith i Gymru bible

Job 13

¹Ydw, dw i wedi gweld hyn i gyd; dw i wedi ei glywed a'i ddeall.

²Dw i'n gwybod cystal â chi; dw i ddim gwaeth na chi!

³Ond dw i eisiau siarad â'r Duw sy'n rheoli popeth [11]; dw i am ddadlau fy achos gyda Duw.

⁴Dych chi'n palu celwyddau i guddio'r gwir! Cwacs! Dyna beth ydych chi.

⁵O na fyddech chi'n cau eich cegau! Dyna fyddai'r peth callaf i chi ei wneud.

⁶Gwrandwch ar beth sydd gen i i'w ddweud; rhowch gyfle i mi ddadlau fy achos.

⁷Ydych chi'n dweud y pethau annheg yma ar ran Duw? Ydych chi'n dweud celwydd er ei fwyn e?

⁸Ydych chi am adael i Dduw ddweud rhywbeth? Neu oes angen i chi ei amddiffyn e?

⁹Sut fydd hi arnoch chi pan fydd e'n eich archwilio chi? Neu allwch chi ei dwyllo fe fel dych chi'n twyllo pobl?

¹⁰Bydd e'n siŵr o'ch ceryddu chi am ddangos ffafr annheg ar y slei.

¹¹Bydd ei ysblander yn codi arswyd arnoch chi, a bydd ei ofn yn cydio ynoch.

¹²Geiriau gwag ydy'ch dywediadau slic chi; atebion disylwedd, yn frau fel clai.

¹³Byddwch ddistaw, i mi gael cyfle i siarad. Beth bynnag fydd yn digwydd i mi,

¹⁴dw i ddim am ollwng gafael! Dw i'n fodlon mentro fy mywyd!

¹⁵Falle y bydd e'n fy lladd i; dw i heb obaith! Ond dw i'n mynd i amddiffyn fy hun o'i flaen e.

¹⁶Yn wir, gallai hyn droi i fod yn achubiaeth i mi — fyddai'r annuwiol byth yn meiddio sefyll o'i flaen.

¹⁷Gwrandwch yn ofalus arna i; clywch beth sydd gen i i'w ddweud.

¹⁸Cewch weld, dw i wedi paratoi fy amddiffyniad, a dw i'n gwybod mai fi sy'n iawn.

¹⁹Petai rhywun yn gallu profi'r achos yn fy erbyn byddwn i'n tewi wedyn a disgwyl marw.

²⁰Ond gwna ddau beth i mi, o Dduw, fel bod dim rhaid i mi guddio oddi wrthot ti:

²¹Tynn dy law yn ôl, a stopia godi dychryn arna i.

²²Yna galw fi i gyfri, a bydda i'n ymateb; neu gad i mi siarad gyntaf, i ti fy ateb i.

²³Sawl gwaith dw i wedi gwneud camgymeriad a phechu? Dangos i mi'r pechod a'r gwrthryfel yn dy erbyn di.

²⁴Pam wyt ti'n cuddio oddi wrtho i? Pam wyt ti'n fy nhrin i fel gelyn?

²⁵Pam pryfocio deilen sy'n cael ei chwythu gan wynt? Pam rhedeg ar ôl us wedi sychu?

²⁶Rwyt wedi dyfarnu cosb chwerw i mi, a gwneud i mi dalu am gamgymeriadau fy ieuenctid.

²⁷Rwyt ti wedi rhoi fy nhraed mewn cyffion, ac yn gwylio popeth dw i'n ei wneud — rwyt ti'n marcio pob cam dw i'n ei gymryd.

²⁸Dw i'n darfod fel rhywbeth yn pydru, neu ddilledyn wedi ei ddifetha gan wyfyn.