Read Gobaith i Gymru Job 14 Bible Online

Job 14 - Gobaith i Gymru bible

Job 14

¹Byr ydy bywyd dyn, wedi ei eni o wraig, ac mae ei ddyddiau yn llawn trafferthion.

²Mae'n blodeuo ac yna'n gwywo; mae'n diflannu fel cysgod, a byth yn aros.

³Ai ar un felly wyt ti'n syllu? Wyt ti am fy rhoi i ar brawf?

⁴Pwy all wneud yr aflan yn lân? Does neb!

⁵Mae dyddiau rhywun wedi eu rhifo; ti'n gwybod faint o fisoedd fydd e'n byw ac wedi gosod ffin fydd e byth yn ei chroesi.

⁶Edrych i ffwrdd a gad lonydd iddo, fel gwas cyflog wedi gorffen ei waith.

⁷Mae gobaith i goeden dyfu eto ar ôl cael ei thorri i lawr. Fydd ei blagur newydd ddim yn methu.

⁸Er bod ei gwreiddiau'n hen yn y pridd, a'i boncyff wedi dechrau pydru,

⁹mae'n synhwyro dŵr ac yn blaguro eto, a'i brigau'n tyfu fel petai newydd ei phlannu.

¹⁰Ond mae'r dyn cryfaf yn marw heb gryfder; mae'n anadlu am y tro olaf, ac mae wedi mynd.

¹¹Fel dŵr yn diflannu o lyn, neu afon yn llifo i ffwrdd ac yn sychu.

¹²Mae pobl feidrol yn gorwedd a byth yn codi; Fydd dim deffro na chodi o'u cwsg tra bydd yr awyr yn dal i fod.

¹³O na fyddet ti'n fy nghuddio'n saff yn y bedd [12], a'm cadw o'r golwg nes i dy ddigofaint fynd heibio; yna gosod amser penodol i'm cofio i eto.

¹⁴Ar ôl i rywun farw, fydd e'n cael byw eto? Ar hyd fy mywyd caled byddwn i'n disgwyl i rywun ddod i'm rhyddhau.

¹⁵Byddet ti'n galw, a byddwn innau'n dod; byddet yn hiraethu am waith dy ddwylo.

¹⁶Byddet ti'n gofalu amdana i bob cam, heb wylio am fy mhechod o hyd.

¹⁷Byddai pob trosedd o'r golwg mewn bag wedi ei selio, a'm pechod wedi ei guddio dan orchudd.

¹⁸Ond na, fel mae mynyddoedd yn cael eu herydu, a chreigiau yn syrthio o'u lle;

¹⁹neu fel mae dŵr yn gwneud carreg yn llyfn, a glaw trwm yn golchi ymaith bridd y ddaear; dyna sut rwyt ti'n lladd gobaith rhywun.

²⁰Ti'n ei drechu'n llwyr — mae ar ben arno! Rwyt yn ei anffurfio ac yn ei anfon i ffwrdd.

²¹Fydd e ddim yn gwybod os bydd ei feibion yn cael anrhydedd; nac yn ymwybodol os cân nhw eu bychanu.

²²Dydy e'n teimlo dim ond ei boen ei hun ac yn poeni dim am neb arall.”