Read Gobaith i Gymru Job 15 Bible Online

Job 15 - Gobaith i Gymru bible

Job 15

¹A dyma Eliffas o Teman yn ymateb:

²“Ydy dyn doeth yn ateb drwy falu awyr? Ti'n llawn o wynt poeth y dwyrain!

³Ydy e'n dadlau ei achos drwy siarad lol, a defnyddio dim ond geiriau gwag?

⁴Dwyt ti'n dangos dim parch at Dduw, ac yn rhwystro eraill rhag myfyrio arno!

⁵Dy bechod sy'n gwneud i ti ddweud y fath bethau; rwyt ti mor gyfrwys yn y ffordd ti'n siarad.

⁶Dy eiriau dy hun sy'n dy gondemnio — nid fi; mae dy geg yn tystio yn dy erbyn di!

⁷Ai ti oedd y dyn cyntaf i gael ei eni? Oeddet ti'n bodoli cyn y bryniau?

⁸Oeddet ti wedi clustfeinio ar gyfrinachau Duw? Ai ti ydy'r unig un doeth?

⁹Beth wyt ti'n ei wybod fwy na ni? Beth wyt ti'n ei ddeall nad ydyn ni'n ei ddeall?

¹⁰Mae oedran a gwallt gwyn o'n plaid ni — dw i wedi byw yn hirach na dy dad!

¹¹Ydy'r cysur mae Duw'n ei gynnig ddim digon? Mae ei eiriau mor garedig a thyner.

¹²Pam wyt ti'n gadael i deimladau dy reoli? Mae dy lygaid yn dangos dy fod wedi gwylltio.

¹³Sut alli di golli dy dymer gyda Duw, a gadael i'r fath eiriau groesi dy wefusau!

¹⁴Sut all person meidrol fod yn lân? Neu un wedi ei eni o wraig honni mai fe sy'n iawn?

¹⁵Os ydy Duw ddim yn gallu trystio ei angylion, a'r byd nefol ddim yn lân yn ei olwg,

¹⁶sut mae'n edrych ar ddynoliaeth ffiaidd, lygredig, sy'n gwneud drwg fel mae'n yfed dŵr!

¹⁷Gwna i ddangos i ti, os gwnei di wrando. Gwna i ddweud beth dw i wedi ei weld —

¹⁸pethau mae dynion doeth wedi eu dangos; pethau wedi eu dysgu gan eu tadau,

¹⁹Cafodd y tir ei roi iddyn nhw, a doedd pobl estron ddim yn eu plith nhw.

²⁰Mae'r dyn drwg yn dioddef poen ar hyd ei fywyd; a'r gormeswr creulon drwy gydol ei holl flynyddoedd.

²¹Mae'n clywed sŵn sy'n ei fygwth o hyd, a phan mae bywyd yn braf mae'r dinistrydd yn dod.

²²Does ganddo ddim gobaith dianc o'r tywyllwch; ac mae'n gwybod y bydd y cleddyf yn ei ladd.

²³Mae'n crwydro — bydd yn fwyd i fwlturiaid; ac mae'n gwybod fod y diwrnod tywyll yn dod.

²⁴Mae'n cael ei ddychryn gan ofid a'i lethu gan bryder, fel brenin ar fin mynd i ryfel.

²⁵Am ei fod wedi codi ei ddwrn i fygwth Duw, a gwrthwynebu'r Duw sy'n rheoli popeth.

²⁶Wedi ei herio ac ymosod arno â'i darian drwchus gref!

²⁷Er ei fod yn llond ei groen ac yn iach a'i lwynau'n gryfion,

²⁸mae'n byw mewn trefi fydd yn cael eu dinistrio, ac mewn tai lle bydd neb ar ôl; rhai fydd yn ddim mwy na pentwr o rwbel.

²⁹Fydd e ddim yn aros yn gyfoethog, a fydd yr hyn sydd ganddo ddim yn para; fydd ganddo ddim eiddo ar wasgar drwy'r wlad.

³⁰Fydd e ddim yn dianc o'r tywyllwch. Fel coeden a'r fflamau wedi llosgi ei brigau; bydd Duw yn anadlu arno, a bydd yn diflannu.

³¹Dylai beidio trystio'r hyn sy'n ddiwerth, a'i dwyllo ei hun, fydd dim yn cael ei dalu'n ôl iddo.

³²Bydd yn gwywo o flaen ei amser, cyn i'w frigau gael cyfle i flaguro.

³³Bydd fel gwinwydden yn gollwng ei grawnwin; neu goeden olewydd yn bwrw ei blodau.

³⁴Mae cwmni pobl annuwiol fel coeden ddiffrwyth; ac mae tân yn llosgi pebyll y rhai sy'n derbyn breib.

³⁵Maen nhw'n beichiogi helynt, yn esgor ar bechod, a'r plentyn yn y groth ydy twyll.”