Read Gobaith i Gymru Job 16 Bible Online

Job 16 - Gobaith i Gymru bible

Job 16

¹Dyma Job yn ateb:

²“Dw i wedi clywed hyn i gyd o'r blaen; Dych chi i gyd yn gysurwyr gwael!

³Oes dim diwedd i'r malu awyr yma? Beth sy'n dy gorddi di fod rhaid i ti gael y gair olaf?

⁴Gallwn innau siarad â chi yr un fath petaech chi yn fy lle i. Gallwn i eich drysu chi â geiriau diddiwedd, ac ysgwyd fy mhen arnoch chi.

⁵Ond eich calonogi chi fyddwn i'n wneud; eich cysuro chi, a lleddfu'r boen.

⁶Ond alla i ddweud dim i leddfu fy mhoen fy hun; ac os ydw i'n cadw'n dawel dydy'r boen ddim llai.

⁷Y ffaith ydy, mae Duw wedi fy llwyr ymlâdd! Mae e wedi dinistrio fy nheulu.

⁸Dw i'n crebachu yn ei law — dw i'n ddim ond croen ac esgyrn ac mae hynny'n tystio yn fy erbyn i.

⁹Mae e'n ddig, ac wedi fy rhwygo'n ddarnau; ac mae'n ysgyrnygu ei ddannedd arna i. Mae'n rhythu fel gelyn,

¹⁰ac mae pobl yn chwerthin ac yn gwneud sbort ar fy mhen. Maen nhw'n rhoi slap sarhaus i mi, ac yn uno gyda'i gilydd yn fy erbyn.

¹¹Mae Duw wedi fy ngadael i'r annuwiol, ac wedi fy nhaflu i ddwylo dynion drwg.

¹²Roedd bywyd yn ddibryder, ond chwalodd y cwbl; gafaelodd yn fy ngwar a'm malu'n ddarnau mân. Mae wedi fy newis fel targed,

¹³ac mae ei saethwyr o'm cwmpas. Mae wedi trywanu fy mherfedd yn ddidrugaredd, ac mae fy ngwaed [13] wedi ei dywallt ar lawr.

¹⁴Dw i fel wal mae'n torri trwyddi dro ar ôl tro, ac mae e'n rhuthro yn fy erbyn fel rhyfelwr.

¹⁵Mae sachliain yn sownd i'm croen; a chladdwyd pob nerth oedd gen i yn y llwch.

¹⁶Ar ôl wylo'n chwerw mae fy wyneb yn goch, ac mae cysgodion tywyll dan fy llygaid.

¹⁷Ond dw i ddim wedi gwneud niwed i neb, ac mae fy ngweddïau'n ddidwyll.

¹⁸Ddaear, paid gorchuddio fy ngwaed! Paid gadael i'm protest fynd o'r golwg!

¹⁹Hyd yn oed nawr, mae gen i dyst yn y nefoedd; mae Un all sefyll gyda mi yn yr uchelder!

²⁰Ond mae fy ffrindiau'n fy nirmygu, tra dw i'n wylo dagrau o flaen Duw.

²¹O na fyddai e'n dadlau achos creadur meidrol, fel rhywun yn amddiffyn ei ffrind.

²²Does gen i ddim llawer o flynyddoedd i fynd cyn y bydda i'n cerdded y llwybr di-droi-nôl.