Read Gobaith i Gymru Job 22 Bible Online

Job 22 - Gobaith i Gymru bible

Job 22

¹A dyma Eliffas o Teman yn ymateb:

²“All person dynol fod o unrhyw help i Dduw? Ydy dyn doeth o unrhyw fudd iddo?

³Ydy'r Un sy'n rheoli popeth ar ei ennill os wyt ti'n ddieuog? Oes mantais iddo dy fod ti'n byw yn iawn?

⁴Ydy e'n dy alw i gyfri am dy fod wedi byw'n dduwiol? Ai dyna pam mae e'n dy farnu di?

⁵Na, mae'n rhaid dy fod wedi gwneud drwg, ac wedi pechu'n ddiddiwedd!

⁶Wedi cymryd gwystl oddi ar bobl heb achos, a'u gadael nhw yn noeth, heb ddillad.

⁷Wnest ti ddim rhoi dŵr i'r sychedig ei yfed, na bara i'w fwyta i bobl oedd yn newynu.

⁸Roeddet ti'n ddyn pwerus, yn berchen tir ac yn byw arno, ac mor freintiedig;

⁹ond yn troi gweddwon i ffwrdd heb ddim, ac yn dwyn eu hawliau oddi ar blant amddifad.

¹⁰Dyna pam rwyt ti wedi dy ddal yn y picil yma, ac yn sydyn yn cael dy hun mewn panig.

¹¹Mae hi mor dywyll arnat ti, alli di weld dim, ac mae'r llifogydd ar fin dy foddi di!

¹²Ydy Duw ddim yn y nefoedd uchod? Edrych ar y sêr pellaf sy mor uchel!

¹³Ond rwyt ti'n dweud, ‘Beth mae Duw'n ei wybod? Ydy e'n gallu barnu drwy'r cymylau duon?

¹⁴Dydy e ddim yn gweld, am fod cymylau yn ei guddio wrth iddo gerdded o gwmpas yn entrychion y nefoedd!’

¹⁵Wyt ti am ddilyn yr un hen ffordd dywyll mae pobl annuwiol wedi ei cherdded? —

¹⁶Cawson nhw eu cipio i ffwrdd o flaen eu hamser, pan lifodd y dilyw dros eu sylfeini.

¹⁷Roedden nhw'n dweud wrth Dduw, ‘Gad lonydd i ni!’ a ‘Beth mae'r Un sy'n rheoli popeth yn gallu ei wneud i ni?’

¹⁸Ac eto Duw oedd yn llenwi eu tai â phethau da! — Dydy ffordd pobl ddrwg o feddwl yn gwneud dim sens i mi!

¹⁹Mae'r rhai cyfiawn yn gweld eu dinistr, ac yn llawen; mae'r diniwed yn eu gwawdio nhw.

²⁰‘Mae'r rhai cas wedi eu dinistrio, a'u cyfoeth wedi ei losgi gan dân.’

²¹Ildia dy hun i Dduw, i ti brofi ei heddwch, wedyn bydd pethau da yn digwydd i ti.

²²Derbyn beth mae e'n ceisio'i ddysgu i ti, a thrysora ei neges yn dy galon.

²³Os gwnei di droi nôl at yr Un sy'n rheoli popeth, cei dy adfer. Os gwnei di stopio ymddwyn yn anghyfiawn.

²⁴Os gwnei di drin dy aur fel petai'n ddim ond pridd; aur pur Offir yn ddim gwell na cherrig mewn nant,

²⁵yna yr Un sy'n rheoli popeth fydd dy aur di, fe fydd fel arian gwerthfawr.

²⁶Bydd yr Un sy'n rheoli popeth yn dy wefreiddio, a byddi'n gallu edrych eto ar Dduw.

²⁷Byddi'n gweddïo arno, a bydd e'n gwrando arnat ti, a byddi'n cadw dy addewidion iddo.

²⁸Pan fyddi'n penderfynu gwneud rhywbeth, byddi'n llwyddo, a bydd golau yn disgleirio ar dy ffyrdd.

²⁹Pan fydd pobl mewn trafferthion, byddi'n galw ‘Helpa nhw!’ a bydd Duw yn achub y digalon.

³⁰Bydd hyd yn oed yn achub yr euog; bydd yn dianc am fod dy ddwylo di'n lân.”