Read Gobaith i Gymru Job 23 Bible Online

Job 23 - Gobaith i Gymru bible

Job 23

¹Dyma Job yn ateb:

²“Dw i am gwyno yn ei erbyn eto heddiw; mae e'n dal i'm cosbi er fy mod i'n griddfan.

³O na fyddwn i'n gwybod ble i ddod o hyd iddo, a sut i gyrraedd ei orsedd, lle mae'n barnu!

⁴Byddwn yn gosod fy achos ger ei fron ac yn cyflwyno llond ceg o ddadleuon iddo.

⁵Byddwn i'n gweld wedyn sut byddai'n fy ateb i a dechrau deall beth mae'n ddweud wrtho i.

⁶Fyddai e'n fy sathru trwy ddadlau yn fy erbyn? Na, byddai'n rhoi gwrandawiad teg i mi.

⁷Yno gall dyn gonest gyflwyno ei achos o'i flaen. Byddai fy marnwr yn fy nghael yn ddieuog am byth!

⁸Dw i'n edrych i'r dwyrain, a dydy e ddim yno; i'r gorllewin, ond dw i'n dal ddim yn ei weld.

⁹Edrych i'r gogledd, a methu dod o hyd iddo; I'r de, ond does dim sôn amdano.

¹⁰Ond mae e'n gwybod popeth amdana i; wedi iddo fy mhrofi, bydda i'n dod allan fel aur pur.

¹¹Dw i wedi ei ddilyn yn ffyddlon, ac wedi cadw ei ffyrdd heb wyro.

¹²Dw i ddim wedi tynnu'n groes i'w orchmynion; a dw i wedi trysori ei eiriau'n fwy na dim byd.

¹³Fe ydy'r unig Un; pwy all newid ei feddwl? Mae'n gwneud beth bynnag mae e eisiau.

¹⁴Bydd yn cyflawni ei gynllun ar fy nghyfer i, fel llawer o gynlluniau eraill sydd ganddo.

¹⁵Dyna pam dw i wedi dychryn o'i flaen; Mae meddwl am y peth yn codi ofn arna i.

¹⁶Mae Duw wedi gwneud i mi anobeithio; mae'r Un sy'n rheoli popeth yn codi arswyd arna i!

¹⁷Ond er gwaetha'r tywyllwch, dw i ddim wedi tewi — y tywyllwch dudew ddaeth drosta i.