Read Gobaith i Gymru Job 26 Bible Online

Job 26 - Gobaith i Gymru bible

Job 26

¹A dyma Job yn ateb:

²“O, ti'n gymaint o help i'r gwan! Ti wedi cynnal braich yr un sydd heb nerth!

³Mae dy gyngor mor werthfawr i rywun sydd mor ddwl! Ti wedi bod mor hael yn rhannu dy ddoethineb!

⁴Pwy wnaeth ddysgu hyn i gyd i ti? Pwy sy'n dy ysbrydoli i siarad fel yma?

⁵Mae'r meirw yn crynu o flaen Duw — pawb sy'n byw yn y byd dan y dŵr.

⁶Mae Annwn [15] yn noeth o'i flaen, ac Abadon [16] heb orchudd i'w guddio.

⁷Duw sy'n lledu'r sêr dros yr anhrefn, ac yn hongian y ddaear uwch y gwagle.

⁸Mae'n rhwymo'r dŵr yn ei gymylau trwchus, ond does yr un yn byrstio dan y pwysau.

⁹Mae'n cuddio wyneb y lleuad llawn drwy ledu ei gymylau drosto.

¹⁰Mae'n marcio'r gorwel ar wyneb y moroedd, fel terfyn rhwng y golau a'r tywyllwch.

¹¹Mae colofnau'r nefoedd yn crynu, wedi eu dychryn gan ei gerydd.

¹²Mae'n gallu tawelu'r môr; trawodd fwystfil y môr [17] i lawr drwy ei ddoethineb.

¹³Mae ei wynt yn clirio'r awyr; trywanodd y sarff wibiog â'i law.

¹⁴A dydy hyn prin yn cyffwrdd ei allu! — mae fel rhyw sibrydiad bach tawel. Pwy all ddychmygu holl rym ei nerth?”