Read Gobaith i Gymru Job 31 Bible Online

Job 31 - Gobaith i Gymru bible

Job 31

¹Dw i wedi ymrwymo i beidio llygadu merch ifanc.

²Beth fyddai rhywun felly'n ei dderbyn gan Dduw? Beth fyddai'n ei gael gan yr Un uchod sy'n rheoli popeth?

³Onid i'r annuwiol mae dinistr yn cael ei roi, a thrychineb i'r un sy'n gwneud drwg?

⁴Ydy e ddim wedi gweld sut dw i wedi byw? Ydy e ddim wedi gwylio pob cam?

⁵Ydw i wedi cymysgu gyda'r rhai celwyddog? Neu wedi bod yn rhy barod i dwyllo?

⁶Dylai fy mhwyso i ar glorian sy'n gywir, iddo weld fy mod i'n gwbl ddieuog.

⁷Os ydw i wedi crwydro o'i ffyrdd a gadael i'm llygaid ddenu'r galon, neu os oes staen drygioni ar fy nwylo,

⁸yna boed i eraill fwyta'r cynhaeaf wnes i ei hau, ac i'r cnwd a blennais gael ei ddinistrio!

⁹Os cafodd fy nghalon ei hudo gan wraig rhywun arall, a minnau'n dechrau loetran wrth ddrws ei thŷ,

¹⁰boed i'm gwraig i falu blawd i ddyn arall, a boed i ddynion eraill orwedd gyda hi!

¹¹Am i mi wneud peth mor ffiaidd — pechod sy'n haeddu ei gosbi.

¹²Mae fel tân sy'n dinistrio'n llwyr [23], ac yn llosgi fy eiddo i gyd.

¹³Ydw i wedi diystyru cwyn caethwas neu forwyn yn fy erbyn erioed?

¹⁴Beth wnawn i pe byddai Duw yn codi i edrych ar y mater? Sut fyddwn i'n ei ateb?

¹⁵Onid Duw greodd nhw, fel fi, yn y groth? Onid yr un Duw sy wedi'n gwneud ni i gyd?

¹⁶Ydw i wedi gwrthod helpu'r tlawd, neu siomi'r weddw oedd yn disgwyl rhywbeth?

¹⁷Ydw i wedi bwyta ar fy mhen fy hun, a gwrthod ei rannu gyda'r amddifad?

¹⁸Na, dw i wedi ei fagu fel tad bob amser, a helpu'r weddw ar hyd fy mywyd.

¹⁹Wnes i erioed adael neb yn rhewi heb ddillad, na gadael rhywun tlawd heb got.

²⁰Bydden nhw'n diolch i mi o waelod calon wrth i wlân fy nefaid eu cadw'n gynnes.

²¹Os gwnes i fygwth yr amddifad, wrth weld fod gen i gefnogaeth yn y llys,

²²yna boed i'm hysgwydd gael ei thynnu o'i lle, a'm braich gael ei thorri wrth y penelin.

²³Roedd gen i ofn i Dduw anfon dinistr; allwn i byth wynebu ei fawredd!

²⁴Ydw i wedi rhoi fy hyder mewn aur, a theimlo'n saff am fod gen i aur coeth?

²⁵Wnes i orfoleddu yn y cyfoeth, a'r holl feddiannau oedd gen i?

²⁶Wnes i edrych ar yr haul yn tywynnu, a'r lleuad yn symud yn ei ysblander,

²⁷nes i'm calon gael ei hudo'n dawel fach, a'm llaw yn taflu cusan i'w haddoli?

²⁸Byddai hynny hefyd yn bechod i'w gosbi — byddwn wedi gwadu'r Duw sydd uchod.

²⁹Oeddwn i'n falch pan oedd fy ngelyn mewn helynt, neu'n cael gwefr o weld pethau'n ddrwg arno?

³⁰Na, wnes i ddweud dim yn ei erbyn na'i felltithio yn y gobaith y byddai'n marw.

³¹Oes unrhyw un o'm teulu wedi dweud, ‘Pam gafodd hwn a hwn ddim croeso wrth fwrdd Job’?

³²Doedd dim rhaid i'r crwydryn gysgu allan ar y stryd, am fod fy nrws yn agored i deithwyr.

³³Ydw i wedi ceisio cuddio fy meiau fel Adda, neu gladdu fy mhechod dan fy mantell,

³⁴am fod gen i ofn barn y dyrfa, a dirmyg pawb o'm cwmpas? — cadw'n dawel a dewis peidio mynd allan.

³⁵O na fyddai gen i rywun i wrando arna i! Dw i'n llofnodi f'amddiffyniad! Boed i'r Un sy'n rheoli popeth fy ateb! Boed i'r un sy'n cyhuddo ddod â gwŷs ddilys yn fy erbyn!

³⁶Byddwn i'n ei chario'n gyhoeddus, a'i gwisgo fel coron ar fy mhen.

³⁷Byddwn yn rhoi cyfrif iddo am bob cam, ac yn camu o'i flaen yn hyderus fel tywysog.

³⁸Os ydy'r tir wedi gweiddi yn fy erbyn, a'i gwysi wedi wylo â'i gilydd —

³⁹Os ydw i wedi dwyn ei gnwd heb dalu, ac achosi i'r tenantiaid lwgu,

⁴⁰yna boed i fieri dyfu yn lle gwenith, a chwyn ffiaidd yn lle haidd!” Roedd Job wedi gorffen siarad.