Read Gobaith i Gymru Job 33 Bible Online

Job 33 - Gobaith i Gymru bible

Job 33

¹Felly Job, gwrando beth sydd gen i i'w ddweud. Gwranda'n ofalus ar fy ngeiriau i.

²Edrych, dw i am agor fy ngheg, a gadael i'm tafod ddweud ei dweud.

³Dw i'n mynd i siarad yn onest, a dweud fy marn yn gwbl agored.

⁴Ysbryd Duw luniodd fi; anadl yr Un sy'n rheoli popeth sy'n fy nghadw i'n fyw.

⁵Ateb fi, os wyt ti'n gallu; gwna dy safiad, a dadlau yn fy erbyn i.

⁶Dŷn ni'n dau yr un fath yng ngolwg Duw; ces innau hefyd fy ngwneud o'r pridd.

⁷Felly does dim byd i ti ei ofni; fydda i ddim yn llawdrwm arnat ti.

⁸Dyma wyt ti wedi ei ddweud, (clywais dy eiriau di'n glir):

⁹‘Dw i'n ddieuog, heb wneud dim o'i le; dw i'n lân, a heb bechu.

¹⁰Ond mae Duw wedi troi yn fy erbyn; mae'n fy nhrin i fel gelyn.

¹¹Mae wedi rhoi fy nhraed mewn cyffion, ac yn gwylio popeth dw i'n ei wneud.’

¹²Dwyt ti ddim yn iawn. A gwna i ddweud pam: Mae Duw yn fwy na dyn.

¹³Pam wyt ti'n dadlau yn ei erbyn? Oes rhaid iddo ateb pob cwestiwn?

¹⁴Mae Duw yn siarad mewn un ffordd un tro, ac mewn ffordd wahanol dro arall — ond er hynny dydy pobl ddim yn deall.

¹⁵Mewn breuddwyd, neu weledigaeth yn y nos, pan mae pobl yn cysgu'n drwm; pan maen nhw'n gorwedd ar eu gwlâu.

¹⁶Mae e'n gwneud i bobl wrando — yn eu dychryn nhw gyda rhybudd

¹⁷i beidio gwneud rhywbeth, a'u stopio nhw rhag bod mor falch.

¹⁸Mae'n achub bywyd rhywun o bwll y bedd, rhag iddo groesi afon marwolaeth.

¹⁹Mae'n disgyblu un sy'n sâl yn ei wely a chryndod di-baid drwy ei esgyrn.

²⁰Mae bwyd yn codi cyfog arno; does ganddo awydd dim byd blasus.

²¹Mae wedi colli cymaint o bwysau, nes bod ei esgyrn i gyd yn y golwg.

²²Mae'n agos iawn at y bedd, bron â'i gipio gan negeswyr marwolaeth.

²³Ond os daw angel at ei ochr (dim ond un o'i blaid, un o blith y mil) i ddadlau ei hawl drosto —

²⁴yna bydd Duw yn drugarog wrtho. ‘Achubwch e rhag mynd i lawr i'r bedd; dw i wedi cael y pris i'w ollwng yn rhydd.’

²⁵Yna bydd ei groen yn iach fel pan oedd yn ifanc; bydd ei egni yn ôl fel yn nyddiau ieuenctid!

²⁶Bydd yn gweddïo, a bydd Duw'n gwrando; bydd yn gweiddi'n llawen wrth fynd i'w bresenoldeb, a bydd Duw yn ei adfer i berthynas iawn ag e'i hun.

²⁷Bydd yn canu o flaen pobl, ‘Pechais, a gwneud y peth anghywir, ond ches i mo'r gosb o'n i'n ei haeddu.

²⁸Mae e wedi fy achub o afael y bedd; dw i'n dal yn fyw, ac yn gweld y golau!’

²⁹Yn wir, mae Duw yn gwneud hyn drosodd a throsodd:

³⁰achub bywyd o bwll y bedd, iddo gael gweld goleuni bywyd.

³¹Edrych, Job, gwranda arna i; gwrando'n dawel i mi gael siarad.

³²Os oes gen ti rywbeth i'w ddweud, ateb fi; dywed, achos dw i eisiau dangos dy fod ti'n iawn.

³³Ond os oes gen ti ddim i'w ddweud, gwranda arna i; gwrando'n dawel, ac fe ddysga i beth sy'n ddoeth i ti.”