Read Gobaith i Gymru Job 34 Bible Online

Job 34 - Gobaith i Gymru bible

Job 34

¹Yna dwedodd Elihw:

²“Gwrandwch be dw i'n ddweud, chi ddynion doeth; Dych chi'n ddynion deallus, felly gwrandwch yn astud.

³Mae'r glust yn profi geiriau fel mae'r geg yn blasu bwyd.

⁴Gadewch i ni ystyried beth sy'n wir; a phenderfynu rhyngon beth sy'n iawn.

⁵Mae Job wedi dweud, ‘Dw i'n ddieuog; dydy Duw ddim wedi bod yn deg â mi.

⁶Fi sy'n iawn. Ydw i i fod i ddweud celwydd? Dw i wedi fy anafu, a does dim gwella ar y clwyf, er fy mod heb droseddu.’

⁷Oes rhywun tebyg i Job? Mae'n dangos dirmyg fel yfed dŵr!

⁸Mae'n cadw cwmni cnafon ac yn ymddwyn fel pobl ddrwg!

⁹Achos mae wedi dweud, ‘Does dim pwynt byw i blesio Duw.’

¹⁰Felly, gwrandwch chi ddynion deallus, Fyddai Duw byth yn gwneud drwg; a'r Un sy'n rheoli popeth yn gwneud dim o'i le!

¹¹Mae e'n talu i bobl am yr hyn maen nhw'n ei wneud, mae pawb yn cael beth maen nhw'n ei haeddu!

¹²Dydy Duw yn sicr ddim yn gwneud drwg; dydy'r Un sy'n rheoli popeth ddim yn gwyrdroi cyfiawnder.

¹³Pwy roddodd y ddaear yn ei ofal? Pwy roddodd hawl iddo roi trefn ar y byd?

¹⁴Petai'n dewis, gallai gymryd ei ysbryd a'i anadl yn ôl,

¹⁵a byddai pob creadur byw yn marw, a'r ddynoliaeth yn mynd yn ôl i'r pridd.

¹⁶Gwranda, os wyt ti'n ddyn deallus; gwrando'n astud ar beth dw i'n ddweud.

¹⁷Ydy rhywun sy'n casáu cyfiawnder yn gallu llywodraethu? Wyt ti'n mynd i gondemnio'r Un Grymus a Chyfiawn

¹⁸sy'n dweud wrth frenin, ‘Y pwdryn diwerth!’ ac wrth wŷr bonheddig, ‘Y cnafon drwg!’?

¹⁹Dydy e ddim yn ochri gyda thywysogion, nac yn ffafrio'r cyfoethog ar draul y tlawd; am mai gwaith ei ddwylo e ydyn nhw i gyd!

²⁰Maen nhw'n marw yn sydyn yng nghanol y nos; mae'r bobl fawr yn cael eu hysgwyd, ac yn diflannu; mae'r pwerus yn cael eu symud o'r ffordd yn hawdd.

²¹Mae e'n cadw golwg ar beth maen nhw'n ei wneud; mae'n gwybod am bob symudiad.

²²Does dim tywyllwch na chwmwl lle gall pobl ddrwg guddio.

²³Nid lle pobl ydy gosod amser i ddod o flaen Duw i gael eu barnu!

²⁴Mae'n dryllio arweinwyr heb gynnal ymchwiliad, ac yn gosod eraill i gymryd eu lle.

²⁵Am ei fod yn gwybod beth maen nhw'n ei wneud, mae'n eu dymchwel dros nos, a'u dryllio.

²⁶Mae'n eu taro nhw i lawr fel pobl ddrwg, ac yn gwneud hynny o flaen pawb,

²⁷am eu bod nhw wedi bod yn anffyddlon iddo, a gwrthod cymryd sylw o'i ffyrdd.

²⁸Maen nhw wedi achosi i'r tlodion alw arno, a gwneud iddo wrando ar gri'r anghenus.

²⁹Os ydy Duw'n cadw'n dawel, pwy sydd i'w feirniadu? Os ydy e'n cuddio, pwy all ddod o hyd iddo? Ond mae e'n dal i wylio dros wledydd a dynoliaeth,

³⁰rhag i rywun annuwiol deyrnasu a gosod maglau i'r bobl.

³¹Ond os dywed rhywun wrth Dduw, ‘Dw i'n euog, a wna i ddim troseddu eto.

³²Dysga fi am y drwg dw i ddim yn ei weld. Os dw i wedi gwneud drwg, wna i ddim yr un peth eto.’

³³Wyt ti'n credu y dylai Duw dalu'n ôl iddo, gan dy fod yn gwrthod gwrando? Ti sydd i ddewis, nid fi; Gad i ni glywed beth sydd gen ti i'w ddweud.

³⁴Bydd dynion deallus yn dweud wrtho i — unrhyw ddyn doeth sy'n gwrando arna i —

³⁵‘Mae Job wedi dweud pethau dwl; dydy ei eiriau'n gwneud dim sens.’

³⁶Dylai gael ei gosbi i'r eithaf am siarad fel mae pobl ddrwg yn siarad.

³⁷Mae e wedi gwneud mwy na phechu — mae e wedi gwrthryfela a gwawdio Duw yn ein plith ni, a chyhuddo Duw'n ddi-stop.”