Read Gobaith i Gymru Job 36 Bible Online

Job 36 - Gobaith i Gymru bible

Job 36

¹A dyma Elihw yn mynd ymlaen i ddweud:

²“Bydd yn amyneddgar â fi am ychydig, mae gen i fwy i'w ddweud ar ran Duw.

³Dw i wedi derbyn gwybodaeth o bell, a dw i am ddangos mai fy Nghrëwr sy'n iawn.

⁴Wir i ti, heb air o gelwydd, mae'r un sydd o dy flaen di wedi deall y cwbl.

⁵Mae Duw yn rymus, ond dydy e ddim yn ddirmygus; mae'n rymus ac yn gwybod beth mae'n ei wneud.

⁶Dydy e ddim yn gadael i bobl ddrwg fyw; mae'n sicrhau cyfiawnder i'r rhai sy'n dioddef.

⁷Mae e'n gofalu am y rhai sy'n gwneud beth sy'n iawn. Mae'n eu hanrhydeddu nhw, a'u gosod ar orseddau fel brenhinoedd.

⁸Ond os ydyn nhw'n gaeth mewn cyffion, wedi eu rhwymo â rhwydi gorthrwm,

⁹mae e'n dangos iddyn nhw beth wnaethon nhw i droseddu, a bod mor haerllug.

¹⁰Mae e'n gwneud iddyn nhw wrando drwy eu disgyblu, a dweud wrthyn nhw am droi cefn ar eu drygioni.

¹¹Os gwnân nhw wrando a bod yn ufudd iddo, byddan nhw'n llwyddo am weddill eu bywydau, ac yn cael blynyddoedd o hapusrwydd.

¹²Ond os na fyddan nhw'n gwrando, byddan nhw'n croesi afon marwolaeth, ac yn darfod heb ddeall dim.

¹³Mae pobl annuwiol yn dal dig; dŷn nhw ddim yn gweiddi am help pan mae Duw'n eu disgyblu.

¹⁴Maen nhw'n marw'n ifanc, ar ôl treulio'u bywydau gyda phuteinwyr.

¹⁵Ond mae Duw'n defnyddio dioddefaint i achub pobl, ac yn defnyddio poen i'w cael nhw i wrando.

¹⁶Y gwir ydy, mae am dy ddenu di oddi wrth ddibyn gofid, o'r gornel gyfyng i le agored; at fwrdd yn llawn o fwyd blasus.

¹⁷Ond rwyt ti'n wynebu barn Duw ar bobl ddrwg, a does dim dianc rhag ei farn gyfiawn.

¹⁸Gwylia rhag i ti gael dy hudo gan gyfoeth, ac i faint y breib dy arwain ar gyfeiliorn.

¹⁹Fyddai dy holl gyfoeth o unrhyw help yn dy helbul? Na fyddai, na dy holl ddylanwad chwaith!

²⁰Paid dyheu am y nos, pan mae pobl yn cael eu cipio i ffwrdd.

²¹Gwylia rhag troi at y drwg — dyna pam ti'n dioddef ac yn cael dy brofi.

²²Edrych, mae nerth Duw yn aruthrol; Pwy sy'n athro tebyg iddo?

²³Pwy sy'n dweud wrtho beth i'w wneud? Pwy sy'n gallu dweud, ‘Ti wedi gwneud peth drwg’?

²⁴Cofia mai dy le di ydy canmol ei waith, sef y rheswm mae pobl yn ei foli ar gân.

²⁵Mae'r ddynoliaeth i gyd wedi gweld ei waith, mae pobl feidrol yn syllu arno o bell.

²⁶Ydy, mae Duw yn fawr — y tu hwnt i'n deall ni; does dim modd cyfri hyd ei oes e!

²⁷Mae'n codi dafnau o ddŵr sy'n diferu'n law mân fel tarth.

²⁸Mae'r cymylau'n tywallt y glaw, mae'n arllwys yn gawodydd ar y ddaear.

²⁹Oes rhywun yn deall sut mae'r cymylau'n lledu, a'r taranau sydd yn ei bafiliwn?

³⁰Edrych, mae'r mellt yn lledu o'i gwmpas, ac yn goleuo gwaelod y môr.

³¹Dyma sut mae'n barnu'r cenhedloedd, ac yn rhoi digonedd o fwyd iddyn nhw.

³²Mae'n dal y mellt yn ei ddwylo, ac yn gwneud iddyn nhw daro'r targed.

³³Mae sŵn ei daranau'n dweud ei fod yn dod mewn storm, yn angerdd ei lid.