Read Gobaith i Gymru Job 37 Bible Online

Job 37 - Gobaith i Gymru bible

Job 37

¹Ac ydy, mae fy nghalon i'n crynu ac yn methu curiad.

²Gwrandwch ar ei lais yn rhuo, ac ar ei eiriau'n atseinio!

³Mae ei fellt yn fflachio drwy'r awyr — ac yn mynd i ben draw'r byd.

⁴Yna wedyn, mae'n rhuo eto, a'i lais cryf yn taranu; mae'r mellt wedi hen ddiflannu pan glywir ei lais.

⁵Mae sŵn llais Duw'n taranu yn rhyfeddol! Ac mae'n gwneud pethau gwyrthiol, tu hwnt i'n deall ni.

⁶Mae'n dweud wrth yr eira, ‘Disgyn ar y ddaear!’ neu wrth y glaw trwm, ‘Arllwys i lawr!’

⁷Mae'n stopio pawb rhag gweithio, mae pobl yn gorfod sefyll yn segur.

⁸Mae anifeiliaid yn mynd i gysgodi, ac i guddio yn eu gwâl.

⁹Mae'r corwynt yn codi o'r de, ac oerni o wyntoedd y gogledd.

¹⁰Anadl Duw sy'n dod â rhew, ac mae'r llynnoedd yn rhewi'n galed.

¹¹Mae'n llenwi'r cymylau trwchus â gwlybaniaeth ac yn anfon mellt ar wasgar o'r cymylau.

¹²Mae'n gwneud i'r cymylau droi a throelli, ac yn gwneud beth mae Duw'n ei orchymyn dros wyneb y ddaear i gyd.

¹³Mae'n gwneud hyn naill ai i gosbi'r tir, neu i ddangos ei gariad ffyddlon.

¹⁴Gwranda ar hyn, Job; Aros i ystyried y pethau rhyfeddol mae Duw'n eu gwneud.

¹⁵Wyt ti'n deall sut mae Duw'n trefnu'r cwbl, ac yn gwneud i'r mellt fflachio o'r cymylau?

¹⁶Wyt ti'n deall sut mae'r cymylau'n aros yn yr awyr? — gwaith rhyfeddol Duw, sy'n deall popeth yn berffaith.

¹⁷Ti, sy'n chwysu yn dy ddillad pan mae'n glòs ac yn boeth dan wynt y de.

¹⁸Alli di helpu Duw i ledu'r awyr, sy'n galed fel drych metel?

¹⁹Dywed wrthon ni beth i'w ddweud wrtho! Dŷn ni ddim yn gwybod, mae hi'n dywyll arnon ni.

²⁰Fyddwn i ddim yn meiddio gofyn am gael siarad! Ydy dyn meidrol yn gofyn am gael ei lyncu ganddo?

²¹Does neb yn gallu edrych ar yr haul pan mae'n disgleirio yn yr awyr, ar ôl i'r gwynt ddod a chlirio'r cymylau i ffwrdd.

²²Fel pelydrau euraid yn llewyrchu o'r gogledd, mae ysblander Duw yn syfrdanol!

²³Mae'r Un sy'n rheoli popeth y tu hwnt i'n cyrraedd ni! Mae ei nerth mor aruthrol fawr! Mae'n gyfiawn ac yn gwneud beth sy'n iawn, a dydy e ddim yn gorthrymu neb.

²⁴Dyna pam mae pobl yn ei ofni. Dydy e'n cymryd dim sylw o'r rhai sy'n ddoeth yn eu golwg eu hunain.”