Read Gobaith i Gymru Job 38 Bible Online

Job 38 - Gobaith i Gymru bible

Job 38

¹Yna dyma'r ARGLWYDD yn ateb Job o'r storm ac yn dweud:

²“Pwy ydy hwn sy'n amau fy nghynllun i, ac yn siarad heb ddeall dim?

³Torcha dy lewys fel dyn! Gofynna i gwestiynau, a gei di ateb.

⁴Ble roeddet ti pan osodais i sylfeini'r ddaear? Ateb fi os wyt ti'n gwybod y cwbl!

⁵Pwy benderfynodd beth fyddai ei maint? — ti'n siŵr o fod yn gwybod! Pwy wnaeth ddefnyddio llinyn i'w mesur?

⁶Ar beth y gosodwyd ei sylfeini? Pwy osododd ei chonglfaen?

⁷Ble oeddet ti pan oedd sêr y bore yn canu gyda'i gilydd a holl angylion Duw yn gweiddi'n llawen?

⁸Pwy gaeodd y drysau ar y môr wrth iddo arllwys allan o'r groth?

⁹Fi roddodd gymylau yn wisg amdano, a'i lapio mewn niwl trwchus.

¹⁰Fi osododd derfyn iddo, a'i gadw tu ôl i ddrysau wedi eu bolltio.

¹¹Dywedais, ‘Cei di ddod hyd yma, ond dim pellach; dyma lle mae ymchwydd dy donnau yn stopio!’

¹²Wyt ti erioed wedi gorchymyn i'r bore ddod, a dangos i'r wawr ble i dorri,

¹³a sut i ledu a gafael yn ymylon y ddaear, ac ysgwyd y rhai drwg oddi arni?

¹⁴Mae ei siâp yn dod i'r golwg fel clai dan sêl, a ffurfiau'r tir i'w gweld fel plygion dilledyn.

¹⁵Mae'r golau'n tarfu ar y rhai drwg, ac mae'r fraich sy'n treisio'n cael ei thorri.

¹⁶Wyt ti wedi bod at y ffynhonnau sy'n llenwi'r môr, neu gerdded mannau dirgel y dyfnder?

¹⁷Ydy giatiau marwolaeth wedi eu dangos i ti? Wyt ti wedi gweld y giatiau i'r tywyllwch dudew?

¹⁸Oes gen ti syniad mor fawr ydy'r ddaear? Os wyt ti'n gwybod hyn i gyd — dywed wrtho i!

¹⁹Pa ffordd mae mynd i ble mae'r golau'n byw? O ble mae'r tywyllwch yn dod?

²⁰Wyt ti'n gallu dangos ble mae ffiniau'r ddau, a dangos iddyn nhw sut i fynd adre?

²¹Mae'n siŵr dy fod, gan dy fod wedi dy eni bryd hynny, ac wedi bod yn fyw ers cymaint o flynyddoedd!

²²Wyt ti wedi bod i mewn i stordai'r eira, neu wedi gweld y storfeydd o genllysg

²³sy'n cael eu cadw ar gyfer y dyddiau anodd, pan mae brwydrau a rhyfeloedd?

²⁴Sut mae mynd i ble mae'r mellt yn cael eu gwasgaru? O ble daw gwynt y dwyrain i chwythu drwy'r byd?

²⁵Pwy gerfiodd sianelau i'r stormydd glaw, a llwybrau i'r mellt a'r taranau,

²⁶iddi lawio ar dir lle does neb yn byw, ac anialwch sydd heb unrhyw un yno?

²⁷Mae'r tir anial sych yn cael ei socian, ac mae glaswellt yn tyfu drosto.

²⁸Oes tad gan y glaw? Pwy genhedlodd y defnynnau gwlith?

²⁹O groth pwy y daeth y rhew? Pwy roddodd enedigaeth i'r barrug,

³⁰pan mae'r dŵr yn troi'n galed, ac wyneb y dyfroedd yn rhewi?

³¹Alli di blethu Pleiades neu ddatod belt Orion?

³²Alli di ddod â'r planedau allan yn eu tymor, neu dywys yr Arth Fawr a'r Arth Fach?

³³Wyt ti'n gyfarwydd â threfn y cosmos, a sut mae'n effeithio ar y ddaear?

³⁴Alli di roi gorchymyn i'r cymylau i arllwys dŵr ar dy ben fel llif?

³⁵Alli di alw ar y mellt i fflachio, a'u cael nhw i ateb ‘Dyma ni’?

³⁶Pwy sy'n rhoi doethineb i'r galon a deall i'r meddwl?

³⁷Pwy sy'n ddigon clyfar i gyfri'r cymylau? Pwy sy'n gallu arllwys dŵr o gostreli'r awyr

³⁸a gwneud i'r pridd lifo fel llaid, ac i'r talpiau o bridd lynu wrth ei gilydd?

³⁹Wyt ti'n gallu hela ysglyfaeth i'r llewes, a rhoi bwyd i'r llewod ifanc

⁴⁰sy'n gorwedd yn eu gwâl, neu'n llechu dan y llwyni am helfa?

⁴¹Pwy sy'n rhoi bwyd i'r gigfran pan mae ei chywion yn galw ar Dduw a hithau'n hedfan o gwmpas heb ddim?