Read Gobaith i Gymru Job 40 Bible Online

Job 40 - Gobaith i Gymru bible

Job 40

¹Dyma'r ARGLWYDD yn dweud wrth Job.

²“Ydy'r un sy'n dadlau gyda'r Hollalluog am ddal i'w gywiro? Beth am i ti sy'n beirniadu Duw roi ateb i mi!”

³A dyma Job yn ateb:

⁴“Mae'n wir, dw i'n neb. Beth alla i ddweud? Dw i'n mynd i gadw'n dawel.

⁵Dw i wedi siarad gormod, ac alla i ddim ateb eto. Dw i am ddweud dim mwy.”

⁶Yna dyma'r ARGLWYDD yn ateb Job o'r storm ac yn dweud:

⁷“Torcha dy lewys fel dyn! Gofynna i gwestiynau, a cei di ateb.

⁸Wyt ti'n gwadu fy mod i'n Dduw cyfiawn? Wyt ti'n fy nghondemnio i er mwyn profi mai ti sy'n iawn?

⁹Wyt ti mor gryf ag ydw i? Ydy dy lais di'n gallu taranu fel fy llais i?

¹⁰Os felly, addurna dy hun ag anrhydedd a mawrhydi. Gwisga dy hun ag ysblander ac urddas.

¹¹Dangos i bawb mor ddig wyt ti; dos ar ôl y bobl falch, a'u rhoi nhw'n eu lle.

¹²Dos ar ôl y bobl falch, a'u cywilyddio nhw; sathra'r rhai drwg yn y fan a'r lle!

¹³Cladda nhw yn y llwch, a'u cloi nhw yn y bedd.

¹⁴Gwna i gyfaddef wedyn dy fod ti'n ddigon cryf i achub dy hun!

¹⁵Edrych ar y Behemoth, a greais i fel y creais i ti; mae e'n bwyta glaswellt fel ychen.

¹⁶Edrych mor gryf ydy ei gluniau, ac ar gryfder cyhyrau ei fol.

¹⁷Mae'n codi ei gynffon fel coeden gedrwydd; mae gewynnau ei gluniau wedi eu gweu i'w gilydd.

¹⁸Mae ei esgyrn fel pibellau pres, a'i goesau fel barrau haearn.

¹⁹Dyma'r creadur cryfaf a greodd Duw; dim ond ei Grëwr all dynnu'r cleddyf a'i ladd.

²⁰Y bryniau sy'n rhoi bwyd iddo, ble mae'r holl anifeiliaid gwylltion eraill yn chwarae.

²¹Mae'n mynd i orwedd dan y llwyn deiliog, o'r golwg yng nghanol brwyn y gors.

²²Mae'r llwyn yn ei guddio dan ei gysgod; a'r coed helyg sydd o'i gwmpas ger y nant.

²³Dydy e ddim yn dychryn pan mae'r afon wedi chwyddo; mae'n ddigyffro wrth i ddŵr yr Iorddonen ruthro drosto.

²⁴All unrhyw un ei ddal tra mae'n gwylio, neu wthio bachyn drwy ei drwyn?