Read Gobaith i Gymru Job 41 Bible Online

Job 41 - Gobaith i Gymru bible

Job 41

¹Alli di ddal y Lefiathan â bachyn pysgota? Alli di rwymo ei dafod â rhaff?

²Alli di roi cylch yn ei drwyn, neu wthio bachyn drwy ei ên?

³Fydd e'n pledio'n daer am drugaredd? Fydd e'n seboni wrth siarad gyda ti?

⁴Fydd e'n ceisio dod i gytundeb, ac addo bod yn gaethwas i ti am byth?

⁵Alli di chwarae gydag e fel aderyn, neu ei rwymo i ddifyrru dy forynion?

⁶Fydd pysgotwyr yn bargeinio amdano? Fydd e'n cael ei rannu rhwng y masnachwyr?

⁷Alli di drywanu ei groen gyda phicellau, neu roi bachau pysgota yn ei geg?

⁸Gafael ynddo, a dychmyga'r frwydr — fyddet ti ddim yn gwneud yr un peth eto!

⁹Pam? Am nad oes gobaith ei ddal; mae hyd yn oed ei olwg yn torri calon rhywun.

¹⁰Does neb yn ddigon dewr i ddeffro hwn, felly pwy sy'n mynd i sefyll yn fy erbyn i?

¹¹Pwy sydd wedi rhoi i mi nes bod dyled arna i iddo? Fi sydd biau popeth dan y nef!

¹²Dw i ddim am fod yn dawel am ei goesau, ei gryfder, a'i gorff gosgeiddig.

¹³Pwy sy'n gallu tynnu ei got oddi arno, neu drywanu ei arfwisg blethog?

¹⁴Pwy sy'n gallu gwthio ei geg ar agor? Mae'r dannedd sydd o'i chwmpas yn frawychus.

¹⁵Mae ei gefn fel rhesi o darianau, wedi eu cloi i'w gilydd gan sêl.

¹⁶Mae un yn cyffwrdd y llall; maen nhw'n hollol dynn yn erbyn ei gilydd.

¹⁷Maen nhw wedi glynu wrth ei gilydd, a does dim modd eu gwahanu nhw.

¹⁸Mae'n fflachio mellt wrth disian. Mae ei lygaid fel pelydrau'r wawr.

¹⁹Mae fflamau yn llifo o'i geg, a gwreichion yn tasgu ohoni.

²⁰Mae mwg yn dod allan o'i ffroenau fel crochan berw yn stemio.

²¹Mae ei anadl yn cynnau marwor; ac mae fflamau'n dod allan o'i geg.

²²Mae ei wddf mor gryf, a nerth yn llamu allan o'i flaen.

²³Mae plygion ei gnawd yn glynu wrth ei gilydd; maen nhw'n dynn amdano, a does dim modd eu symud.

²⁴Mae ei galon yn galed fel y graig, yn solet fel maen melin.

²⁵Pan mae'n codi mae'r rhai cryfaf yn dychryn; wrth iddo gynhyrfu maen nhw'n camu'n ôl.

²⁶Dydy ei daro gyda'r cleddyf yn cael dim effaith, na gwaywffon, na saeth, na phicell.

²⁷Mae'n trin haearn fel gwellt, a phres fel pren wedi pydru.

²⁸Dydy saethau ddim yn gwneud iddo ffoi, ac mae cerrig tafl fel us yn ei olwg.

²⁹Mae pastwn fel gwelltyn yn ei daro, ac mae'n chwerthin ar y cleddyf sy'n clecian.

³⁰Oddi tano mae fel darnau o botyn wedi torri, ac mae'n gadael ei ôl yn y llaid fel llusg ddyrnu.

³¹Mae'n gwneud i'r dŵr dwfn ferwi fel crochan, ac i'r môr gorddi fel eli'n cael ei gymysgu.

³²Mae'n gadael llwybr gloyw ar ei ôl, ac mae'r dŵr dwfn yn edrych fel gwallt gwyn.

³³Does dim byd tebyg iddo'n fyw ar y ddaear; creadur sy'n ofni dim byd.

³⁴Mae'n edrych i lawr ar bob anifail cryf; mae'n frenin ar bopeth balch.”