Read Gobaith i Gymru Job 5 Bible Online

Job 5 - Gobaith i Gymru bible

Job 5

¹Galw am help! Fydd rhywun yn dy ateb di? At ba un o'r angylion sanctaidd wyt ti'n mynd i droi?

²Mae'r ffŵl byrbwyll yn marw o ddiffyg amynedd, a'r person dwl pan mae'n dal dig.

³Dw i wedi gweld y ffŵl yn llwyddo a gwreiddio, ond yna'n sydyn roedd ei gartre wedi ei felltithio.

⁴Dydy ei blant byth yn saff — byddan nhw'n colli'r achos yn y llys, heb neb i'w hachub.

⁵Bydd pobl newynog yn bwyta ei gnydau, a'i gario i ffwrdd i'w guddio; [6] a'r rhai sy'n llwgu yn ysu am ei gyfoeth.

⁶Dydy profiadau drwg ddim yn tyfu o'r pridd, na thrafferthion yn egino o'r ddaear;

⁷ond mae pobl yn cael eu geni i drafferthion, mor siŵr ag mae gwreichion yn hedfan i fyny.

⁸Petawn i'n ti, byddwn i'n troi at Dduw, ac yn gosod fy achos o'i flaen.

⁹Mae e'n gwneud pethau mawr, tu hwnt i'n deall ni, cymaint o bethau rhyfeddol, ni ellir eu cyfri!

¹⁰Mae e'n anfon glaw i'r ddaear, ac yn dyfrio'r caeau.

¹¹Mae e'n codi'r rhai sy'n isel, ac yn gwneud y rhai sy'n galaru yn ddiogel.

¹²Mae e'n drysu cynlluniau'r cyfrwys, i'w hatal rhag llwyddo.

¹³Mae'n gwneud i glyfrwch pobl eu baglu nhw; mae cynlluniau'r cyfrwys yn mynd o chwith.

¹⁴Maen nhw'n cael eu hunain mewn tywyllwch yng ngolau dydd, ac yn ymbalfalu ganol dydd fel petai'n nos!

¹⁵Ond mae e'n achub y tlawd rhag eu geiriau creulon, a'r anghenus o afael y rhai cryf.

¹⁶Felly mae gobaith i'r tlawd, ac mae anghyfiawnder yn gorfod tewi!

¹⁷Mae'r rhai mae Duw'n eu ceryddu wedi eu bendithio'n fawr; felly paid gwrthod disgyblaeth y Duw sy'n rheoli popeth!

¹⁸Mae e yn anafu, ond hefyd yn rhwymo'r anaf; Mae'n dolurio, ond mae ei ddwylo hefyd yn iacháu.

¹⁹Bydd yn dy achub rhag un trychineb ar ôl y llall; chei di ddim niwed byth.

²⁰Mewn newyn bydd yn dy ryddhau o afael marwolaeth, ac mewn rhyfel, o afael y cleddyf.

²¹Byddi'n cael dy amddiffyn rhag y tafod maleisus; a fyddi di ddim yn ofni dinistr pan ddaw yn agos.

²²Byddi'n gwawdio dinistr a newyn, a fydd gen ti ddim ofn anifeiliaid gwylltion.

²³Bydd cerrig yn cytuno i gadw draw o dy dir, a fydd anifeiliaid gwylltion ddim yn ymosod arnat ti.

²⁴Byddi'n gwybod fod dy gartref yn ddiogel, ac wrth archwilio dy anifeiliaid, fydd dim un ar goll.

²⁵Byddi'n siŵr o gael llawer iawn o blant; bydd dy ddisgynyddion fel glaswellt ar y tir.

²⁶Byddi mewn oedran mawr pan gyrhaeddi'r bedd, fel ysgub o wenith yn cael ei gasglu yn ei dymor.

²⁷Edrych! Dŷn ni wedi astudio hyn yn fanwl, ac mae'n wir. Felly gwrando, a meddylia sut mae'n berthnasol i ti.”