Read Gobaith i Gymru Job 6 Bible Online

Job 6 - Gobaith i Gymru bible

Job 6

¹A dyma Job yn ateb:

²“Petai fy rhwystredigaeth yn cael ei bwyso, a'm helyntion yn cael eu rhoi mewn clorian,

³bydden nhw'n drymach na holl dywod y môr! Dim syndod fy mod i wedi siarad yn fyrbwyll!

⁴Mae saethau'r Duw Hollalluog yn fy nghorff, ac mae fy ysbryd wedi sugno eu gwenwyn. Mae'r dychryn mae Duw yn ei achosi fel rhes o filwyr yn ymosod arna i.

⁵Ydy asyn gwyllt yn nadu pan mae ganddo laswellt? Ydy ychen yn brefu pan mae ganddo borfa?

⁶Ydy bwyd di-flas yn cael ei fwyta heb halen? Oes blas ar y gwynwy?

⁷Dw i'n gwrthod eu cyffwrdd nhw; maen nhw'n gwneud i mi fod eisiau chwydu.

⁸O na fyddwn i'n cael fy nymuniad, a bod Duw yn rhoi i mi beth dw i eisiau.

⁹O na fyddai Duw yn fodlon fy lladd fel pryf, trwy godi ei law a'm taro i lawr!

¹⁰Faint bynnag o boen fyddai'n rhaid i mi ei ddiodde, byddai'n gysur i mi fy mod heb wrthod geiriau'r Un Sanctaidd.

¹¹Does gen i mo'r cryfder i ddal ati; beth ydy'r pwynt o aros yn fyw?

¹²Oes gen i gryfder fel y graig? Oes gen i gnawd fel pres?

¹³Y gwir ydy, does gen i ddim nerth o gwbl! Alla i wneud dim i helpu fy hunan.

¹⁴Dylai rhywun sy'n anobeithio gael ffrindiau sy'n ffyddlon, hyd yn oed os ydy e'n troi ei gefn ar yr Un sy'n rheoli popeth;

¹⁵Ond alla i ddim dibynnu o gwbl arnoch chi, frodyr! Dych chi fel sychnant lle roedd dŵr yn gorlifo ar un adeg.

¹⁶Fel ffrwd sy'n dywyll o dan rew ac wedi ei chuddio o dan eira;

¹⁷ond cyn gynted ag y mae'n meirioli mae'n sychu — yn y gwres tanbaid mae hi'n diflannu.

¹⁸Mae carafanau camelod yn gadael eu llwybr, ac yn troi am y tir anial, ond mae'r ffrwd wedi mynd.

¹⁹Mae carafanau Tema yn chwilio am y dŵr, a marchnatwyr Sheba [7] yn gobeithio dod o hyd iddo.

²⁰Maen nhw mor hyderus, ond byddan nhw'n cael eu siomi; byddan nhw'n cyrraedd y lle, ac yn sefyll yno'n syfrdan.

²¹Ac felly dych chi! Fel nant wedi sychu, yn dda i ddim! Dych chi'n gweld fy helynt, ac yn cael eich dychryn.

²²Ydw i wedi dweud, ‘Rhowch rodd i mi!’ neu, ‘Talwch gildwrn drosto i o'ch cyfoeth’?

²³‘Achubwch fi o afael y gelyn!’ neu, ‘Rhyddhewch fi o afael y gormeswyr!’?

²⁴Dangoswch i mi beth wnes i, a bydda i'n tewi; Esboniwch i mi beth wnes i o'i le!

²⁵Mae geiriau gonest yn gallu bod yn greulon! Ond beth mae'ch cerydd chi yn ei brofi?

²⁶Ydy hi'n iawn i chi geryddu â'ch geiriau wrth gyhuddo dyn diobaith o siarad gwag?

²⁷Mae fel gamblo gyda bywyd yr amddifad, neu roi bywyd eich cyfaill ar ocsiwn!

²⁸Nawr dewch! Edrychwch arna i! Fyddwn i'n dweud celwydd yn eich wynebau chi?

²⁹Dewch! Plîs peidiwch bod mor annheg! Meddyliwch eto! Mae fy ngonestrwydd i yn y fantol.

³⁰Na, dw i ddim yn dweud celwydd, a dw i'n gwybod y gwahaniaeth rhwng drwg a da.