Read Gobaith i Gymru Job 7 Bible Online

Job 7 - Gobaith i Gymru bible

Job 7

¹Pam mae bywyd dyn ar y ddaear mor galed? Mae ei ddyddiau fel dyddiau gwas cyflog —

²fel caethwas yn dyheu am gysgod, neu was cyflog yn disgwyl am ei dâl.

³Mis ar ôl mis o fyw dibwrpas, a nosweithiau diddiwedd o dristwch.

⁴Pan dw i'n gorwedd i lawr, dw i'n meddwl, ‘Pryd dw i'n mynd i fedru codi?’ Mae'r nos yn llusgo'n araf, a dw i'n troi a throsi nes iddi wawrio.

⁵Mae briwiau a chrachod dros fy nghorff i gyd; mae'r croen wedi cracio ac yn casglu.

⁶Mae dyddiau fy mywyd wedi hedfan fel gwennol gwehydd, ac yn dod i ben mewn anobaith.

⁷O Dduw, cofia mai anadl ydy fy mywyd! Wna i ddim profi pleser byth eto.

⁸Fydd y llygaid sy'n edrych arna i yn fy ngweld i ddim mwy; bydda i wedi diflannu mewn chwinciad.

⁹Fel cwmwl yn chwalu ac yn diflannu, dydy'r un sy'n mynd i'r bedd byth yn dod yn ôl i fyny;

¹⁰fydd e byth yn mynd adre eto; a fydd y lle roedd yn byw ddim yn ei gofio.

¹¹Felly, dw i ddim am gadw'n dawel! dw i'n mynd i rannu fy ngwewyr meddwl; dw i'n teimlo'n chwerw, a dw i'n mynd i gwyno.

¹²Ai'r môr ydw i, neu anghenfil y dyfroedd, [8] i ti orfod fy nghadw yn gaeth?

¹³Pan dw i'n meddwl, ‘Bydd mynd i'r gwely'n gysur, a gorffwys yn gwneud i mi deimlo'n well,’

¹⁴ti'n fy nychryn â breuddwydion, ac yn codi braw â hunllefau.

¹⁵Byddai'n well gen i gael fy stranglo; mae marwolaeth yn well na bodolaeth.

¹⁶Dw i wedi cael llond bol, does gen i ddim eisiau byw ddim mwy; Gad lonydd i mi, mae fy nyddiau'n mynd heibio fel mwg.

¹⁷Beth ydy person dynol, i ti boeni amdano, a rhoi cymaint o sylw iddo?

¹⁸Ti'n ei archwilio bob bore, ac yn ei brofi bob munud.

¹⁹Wyt ti byth yn mynd i edrych i ffwrdd? Rho gyfle i mi lyncu fy mhoeryn!

²⁰Os dw i wedi pechu, beth dw i wedi ei wneud i ti, ti Wyliwr pobl? Pam dewis fi yn darged? Ydw i wedi troi'n gymaint o faich i ti?

²¹Pam wnei di ddim maddau i mi am droseddu, a chael gwared â'm pechod? Achos bydda i'n gorwedd yn farw cyn pen dim; byddi'n edrych amdana i, ond bydda i wedi mynd.”