Read Gobaith i Gymru Job 8 Bible Online

Job 8 - Gobaith i Gymru bible

Job 8

¹Dyma Bildad o Shwach yn ymateb:

²“Am faint wyt ti'n mynd i ddal ati i siarad fel yma? Mae dy eiriau'n wyllt fel gwynt stormus!

³Ydy Duw yn gwyrdroi cyfiawnder? Ydy'r Un sy'n rheoli popeth yn ystumio beth sy'n iawn?

⁴Roedd dy feibion wedi pechu yn ei erbyn, ac mae e wedi gadael iddyn nhw wynebu canlyniadau eu gwrthryfel.

⁵Ond os gwnei di droi at Dduw a gofyn i'r Duw sy'n rheoli popeth dy helpu,

⁶os wyt ti'n ddi-fai ac yn byw yn iawn, bydd e'n dy amddiffyn di, ac yn dy adfer i dy gyflwr cyfiawn.

⁷Er bod dy ddechrau'n fach, bydd dy lwyddiant yn fawr i'r dyfodol.

⁸Gofyn i'r genhedlaeth sydd wedi mynd heibio, meddylia am yr hyn wnaeth pobl ddarganfod ers talwm.

⁹(Achos dim ond yn ddiweddar y daethon ni i'r golwg, a dŷn ni'n gwybod dim; a dydy'n dyddiau ni ar y ddaear yn ddim ond cysgod.)

¹⁰Byddan nhw'n siŵr o dy ddysgu, ac esbonio beth wnaethon nhw ei ddeall.

¹¹Ydy papurfrwyn yn gallu tyfu heb gors? Ydy brwyn yn gallu tyfu heb ddŵr?

¹²Wrth ddechrau tyfu, cyn bod yn barod i'w torri, bydden nhw'n gwywo'n gynt na'r glaswellt.

¹³Dyna sy'n digwydd i'r rhai sy'n anghofio Duw; mae gobaith yr annuwiol yn diflannu —

¹⁴mae fel gafael mewn edau frau, neu bwyso ar we pry cop.

¹⁵Mae'n pwyso arno ac yn syrthio; mae'n gafael ynddo i godi, ond yn methu.

¹⁶Dan wenau'r haul mae'n blanhigyn iach wedi ei ddyfrio, a'i frigau'n lledu drwy'r ardd.

¹⁷Mae ei wreiddiau'n lapio am bentwr o gerrig, ac yn edrych am le rhwng y meini.

¹⁸Ond pan mae'n cael ei godi a'i ddiwreiddio, bydd yr ardd lle roedd yn tyfu yn dweud ‘Dw i erioed wedi dy weld di.’

¹⁹Dyna fydd ei ddiwedd hapus! A bydd planhigion eraill yn tyfu yn ei le.

²⁰Edrych! Dydy Duw ddim yn gwrthod pobl onest, nac yn helpu pobl ddrwg!

²¹Bydd yn gwneud i ti chwerthin unwaith eto, a byddi'n gweiddi'n llawen!

²²Bydd dy elynion yn cael eu cywilyddio, a bydd pebyll pobl ddrwg yn diflannu.”