Read Gobaith i Gymru Salm 10 Bible Online

Salm 10 - Gobaith i Gymru bible

Salm 10

¹O ARGLWYDD, pam wyt ti'n cadw draw? Pam wyt ti'n aros o'r golwg pan mae pethau'n anodd arna i?

²Mae'r rhai drwg mor hy! Maen nhw'n hela'r tlawd — gwna iddyn nhw gael eu dal gan eu dyfais eu hunain!

³Mae'r un drwg yn brolio ei fod yn cael ei ffordd ei hun; a'r lleidr yn melltithio a dirmygu'r ARGLWYDD.

⁴Mae'r un drwg mor falch, yn swancio ac yn dweud wrth ddirmygu'r ARGLWYDD: “Dydy e ddim yn galw neb i gyfri; Dydy Duw ddim yn bodoli!”

⁵Ydy, mae'n meddwl y bydd e'n llwyddo bob amser. Dydy e'n gwybod dim am dy safonau di; ac mae'n wfftio pawb sy'n ei wrthwynebu.

⁶Mae'n meddwl wrtho'i hun, “Dw i'n hollol saff. Mae popeth yn iawn! Fydda i byth mewn trafferthion.”

⁷Mae e mor gegog! — yn llawn melltith a thwyll a gormes; a'i dafod yn gwneud dim ond drwg ac achosi trafferthion!

⁸Mae'n cuddio wrth y pentrefi, yn barod i ymosod; mae'n neidio o'i guddfan a lladd y dieuog — unrhyw un sy'n ddigon anffodus.

⁹Mae'n disgwyl yn ei guddfan fel llew yn ei ffau, yn barod i ddal y truan a'i gam-drin; ac mae'n ei ddal yn ei rwyd.

¹⁰Mae'n plygu i lawr, yn swatio, ac mae rhywun anlwcus yn syrthio i'w grafangau.

¹¹Mae'n dweud wrtho'i hun, “Dydy Duw ddim yn poeni! Dydy e'n cymryd dim sylw. Dydy e byth yn edrych!”

¹²Cod, O ARGLWYDD! Cod dy law i'w daro, O Dduw! Paid anghofio'r rhai sy'n cael eu gorthrymu.

¹³Pam ddylai dyn drwg gael dilorni Duw a meddwl dy fod ti'n galw neb i gyfri?

¹⁴Ti'n gweld y cwbl — ti'n sylwi ar y poen a'r dioddefaint. A byddi'n talu'n ôl! Mae'r un oedd yn anlwcus yn dy drystio di, am mai ti sy'n helpu plant amddifad.

¹⁵Torra rym y dyn drwg! Galw fe i gyfrif am y drygioni roedd e'n meddwl na fyddet ti'n ei weld.

¹⁶Mae'r ARGLWYDD yn frenin am byth a bydd y cenhedloedd yn diflannu o'r tir!

¹⁷Ti'n gwrando ar lais y rhai sy'n cael eu gorthrymu yn crefu arnat, O ARGLWYDD. Byddan nhw'n teimlo'n saff am dy fod ti'n gwrando arnyn nhw.

¹⁸Unwaith eto byddi'n rhoi cyfiawnder i'r amddifad a'r rhai sy'n cael eu sathru; byddi'n stopio dynion meidrol rhag eu gormesu.