Read Gobaith i Gymru Salm 102 Bible Online

Salm 102 - Gobaith i Gymru bible

Salm 102

¹Gweddi rhywun sy'n diodde, ac yn tywallt ei galon o flaen yr ARGLWYDD. [1] O ARGLWYDD, clyw fy ngweddi; gwrando arna i'n gweiddi am help.

²Paid troi cefn arna i pan dw i mewn trafferthion. Gwranda arna i! Rho ateb buan i mi pan dw i'n galw.

³Mae fy mywyd i'n diflannu fel mwg, ac mae fy esgyrn yn llosgi fel marwor poeth.

⁴Dw i mor ddigalon, ac yn gwywo fel glaswellt. Dw i ddim yn teimlo fel bwyta hyd yn oed.

⁵Dw i ddim yn stopio tuchan; mae fy esgyrn i'w gweld drwy fy nghroen.

⁶Dw i fel jac-y-do yn yr anialwch; fel tylluan yng nghanol adfeilion.

⁷Dw i'n methu cysgu. Dw i fel aderyn unig ar ben tŷ.

⁸Mae fy ngelynion yn fy enllibio drwy'r dydd; maen nhw'n fy rhegi ac yn gwneud sbort ar fy mhen.

⁹Lludw ydy'r unig fwyd sydd gen i, ac mae fy niod wedi ei gymysgu â dagrau,

¹⁰am dy fod ti'n ddig ac wedi gwylltio hefo fi. Rwyt ti wedi gafael yno i, a'm taflu i ffwrdd fel baw!

¹¹Mae fy mywyd fel cysgod ar ddiwedd y dydd; dw i'n gwywo fel glaswellt.

¹²Ond byddi di, ARGLWYDD, ar dy orsedd am byth! Mae pobl yn galw ar dy enw ar hyd y cenedlaethau!

¹³Byddi di yn codi ac yn dangos trugaredd at Seion eto. Mae'n bryd i ti fod yn garedig ati! Mae'r amser i wneud hynny wedi dod.

¹⁴Mae dy weision yn caru ei meini, ac yn teimlo i'r byw wrth weld y rwbel!

¹⁵Wedyn bydd y cenhedloedd yn parchu enw'r ARGLWYDD. Bydd brenhinoedd y byd i gyd yn ofni ei ysblander.

¹⁶Bydd yr ARGLWYDD yn ailadeiladu Seion! Bydd yn cael ei weld yn ei holl ysblander.

¹⁷Achos mae e'n gwrando ar weddi y rhai sydd mewn angen; dydy e ddim yn diystyru eu cri nhw.

¹⁸Dylai hyn gael ei ysgrifennu i lawr ar gyfer y dyfodol, er mwyn i bobl sydd heb gael eu geni eto, foli'r ARGLWYDD.

¹⁹Bydd yr ARGLWYDD yn edrych i lawr o'i gysegr uchel iawn, Bydd yn edrych i lawr ar y ddaear o'r nefoedd uchod,

²⁰ac yn gwrando ar riddfan y rhai oedd yn gaeth. Bydd yn rhyddhau y rhai oedd wedi eu condemnio i farwolaeth.

²¹Wedyn bydd enw'r ARGLWYDD yn cael ei gyhoeddi o Seion, a bydd e'n cael ei addoli yn Jerwsalem.

²²Bydd pobl o'r gwledydd i gyd yn dod at ei gilydd i addoli'r ARGLWYDD.

²³Mae wedi ysigo fy nerth i ar ganol y daith, Mae wedi penderfynu rhoi bywyd byr i mi.

²⁴“O Dduw, paid cymryd fi hanner ffordd drwy fy mywyd! — Rwyt ti'n aros ar hyd y cenedlaethau.

²⁵Ti osododd y ddaear yn ei lle ers talwm; a gwaith dy ddwylo di ydy'r sêr a'r planedau.

²⁶Byddan nhw'n darfod, ond rwyt ti'n aros. Byddan nhw'n mynd yn hen fel dillad wedi eu gwisgo. Byddi di'n eu tynnu fel dilledyn, a byddan nhw wedi mynd.

²⁷Ond rwyt ti yn aros am byth — dwyt ti byth yn mynd yn hen!

²⁸Bydd plant dy weision yn dal i gael byw yma, a bydd eu plant nhw yn saff yn dy bresenoldeb di.”