Read Gobaith i Gymru Salm 103 Bible Online

Salm 103 - Gobaith i Gymru bible

Salm 103

¹Salm Dafydd. [1] Fy enaid, bendithia'r ARGLWYDD! Y cwbl ohono i, bendithia'i enw sanctaidd!

²Fy enaid, bendithia'r ARGLWYDD! Paid anghofio'r holl bethau caredig a wnaeth.

³Mae wedi maddau dy fethiant i gyd, ac wedi iacháu pob salwch oedd arnat.

⁴Mae wedi dy gadw di rhag mynd i'r bedd, ac wedi dy goroni gyda'i gariad a'i drugaredd.

⁵Mae wedi rhoi mwy na digon o bethau da i ti, nes gwneud i ti deimlo'n ifanc eto, yn gryf ac yn llawn bywyd fel eryr!

⁶Mae'r ARGLWYDD bob amser yn deg, ac yn rhoi cyfiawnder i'r rhai sy'n cael eu gorthrymu.

⁷Dwedodd wrth Moses sut oedd e am i ni fyw, a dangosodd i bobl Israel beth allai ei wneud.

⁸Mae'r ARGLWYDD mor drugarog a charedig; mor amyneddgar ac anhygoel o hael! [61†]

⁹Dydy e ddim yn ceryddu pobl yn ddiddiwedd, nac yn dal dig am byth.

¹⁰Wnaeth e ddim delio gyda'n pechodau ni fel roedden ni'n haeddu, na talu'n ôl i ni am ein holl fethiant.

¹¹Fel mae'r nefoedd yn uchel uwch y ddaear, mae ei gariad ffyddlon fel tŵr dros y rhai sy'n ei barchu.

¹²Mor bell ac ydy'r dwyrain o'r gorllewin, mae wedi symud y gosb am i ni wrthryfela.

¹³Fel mae tad yn caru ei blant, mae'r ARGLWYDD yn caru'r rhai sy'n ei barchu.

¹⁴Ydy, mae e'n gwybod am ein defnydd ni; mae'n cofio mai dim ond pridd ydyn ni.

¹⁵Mae bywyd dynol fel glaswellt — mae fel blodyn gwyllt, yn tyfu dros dro;

¹⁶pan mae'r gwynt yn dod heibio, mae wedi mynd; ble roedd does dim sôn amdano.

¹⁷Ond mae cariad yr ARGLWYDD at y rhai sy'n ei barchu yn para am byth bythoedd! Mae e'n cadw ei air i genedlaethau o blant —

¹⁸sef y rhai sy'n ffyddlon i'w ymrwymiad, ac sy'n gofalu gwneud beth mae e'n ddweud.

¹⁹Mae'r ARGLWYDD wedi sefydlu ei orsedd yn y nefoedd, ac mae'n teyrnasu yn frenin dros bopeth!

²⁰Bendithiwch yr ARGLWYDD, ei angylion! — chi rai cryfion sy'n gwneud beth mae'n ddweud sy'n gwrando ac yn ufudd iddo.

²¹Bendithiwch yr ARGLWYDD, ei holl fyddinoedd! — chi weision sy'n ei wasanaethu;

²²Bendithiwch yr ARGLWYDD, bopeth mae wedi ei greu! — ym mhobman ble mae e'n teyrnasu. Fy enaid, bendithia'r ARGLWYDD!