Read Gobaith i Gymru Salm 107 Bible Online

Salm 107 - Gobaith i Gymru bible

Salm 107

¹Diolchwch i'r ARGLWYDD! Mae e mor dda aton ni! Mae ei haelioni yn ddiddiwedd!

²Gadewch i'r rhai mae'r ARGLWYDD wedi eu gollwng yn rhydd ddweud hyn, ie, y rhai sydd wedi eu rhyddhau o afael y gelyn.

³Maen nhw'n cael eu casglu o'r gwledydd eraill, o'r dwyrain, gorllewin, gogledd a de.

⁴Roedden nhw'n crwydro ar goll yn yr anialwch gwyllt, ac yn methu dod o hyd i dre ble gallen nhw fyw.

⁵Roedden nhw eisiau bwyd ac roedd syched arnyn nhw, ac roedden nhw wedi colli bob egni.

⁶Dyma nhw'n galw ar yr ARGLWYDD yn eu trybini, a dyma fe'n eu hachub o'u trafferthion,

⁷ac yn eu harwain nhw'n syth i le y gallen nhw setlo i lawr.

⁸Gadewch iddyn nhw ddiolch i'r ARGLWYDD am ei gariad ffyddlon, a'r pethau rhyfeddol mae wedi eu gwneud ar ran pobl!

⁹Mae wedi rhoi diod i'r sychedig, a bwyd da i'r rhai oedd yn llwgu.

¹⁰Roedd rhai yn byw mewn tywyllwch dudew, ac yn gaeth mewn cadwyni haearn,

¹¹am eu bod nhw wedi gwrthod gwrando ar Dduw, a gwrthod gwneud beth roedd y Goruchaf eisiau.

¹²Deliodd hefo nhw drwy wneud iddyn nhw ddiodde. Roedden nhw'n baglu, a doedd neb i'w helpu.

¹³Yna dyma nhw'n galw ar yr ARGLWYDD yn eu trybini, a dyma fe'n eu hachub o'u trafferthion.

¹⁴Daeth â nhw allan o'r tywyllwch, a thorri'r rhaffau oedd yn eu rhwymo.

¹⁵Gadewch iddyn nhw ddiolch i'r ARGLWYDD am ei gariad ffyddlon, a'r pethau rhyfeddol mae wedi eu gwneud ar ran pobl!

¹⁶Mae wedi dryllio'r drysau pres, a thorri'r barrau haearn.

¹⁷Buodd rhai yn anfoesol, ac roedd rhaid iddyn nhw ddiodde am bechu a chamfihafio.

¹⁸Roedden nhw'n methu cadw eu bwyd i lawr, ac roedden nhw'n agos at farw.

¹⁹Ond dyma nhw'n galw ar yr ARGLWYDD yn eu trybini, a dyma fe'n eu hachub o'u trafferthion.

²⁰Dyma fe'n gorchymyn iddyn nhw gael eu hiacháu, ac yn eu hachub nhw o bwll marwolaeth.

²¹Gadewch iddyn nhw ddiolch i'r ARGLWYDD am ei gariad ffyddlon, a'r pethau rhyfeddol mae wedi eu gwneud ar ran pobl!

²²Gadewch iddyn nhw gyflwyno offrymau diolch iddo, a chanu'n llawen am y cwbl mae wedi ei wneud!

²³Aeth rhai eraill ar longau i'r môr, i ennill bywoliaeth ar y môr mawr.

²⁴Cawson nhw hefyd weld beth allai'r ARGLWYDD ei wneud, y pethau rhyfeddol wnaeth e ar y moroedd dwfn.

²⁵Roedd yn rhoi gorchymyn i wynt stormus godi, ac yn gwneud i'r tonnau godi'n uchel.

²⁶I fyny i'r awyr, ac i lawr i'r dyfnder â nhw! Roedd ganddyn nhw ofn am eu bywydau.

²⁷Roedd y cwch yn siglo a gwegian fel rhywun wedi meddwi, a doedd eu holl brofiad ar y môr yn dda i ddim.

²⁸Dyma nhw'n galw ar yr ARGLWYDD yn eu trybini, a dyma fe'n eu hachub o'u trafferthion.

²⁹Gwnaeth i'r storm dawelu; roedd y tonnau'n llonydd.

³⁰Roedden nhw mor falch fod y storm wedi tawelu, ac aeth Duw â nhw i'r porthladd o'u dewis.

³¹Gadewch iddyn nhw ddiolch i'r ARGLWYDD am ei gariad ffyddlon, a'r pethau rhyfeddol mae wedi eu gwneud ar ran pobl!

³²Gadewch iddyn nhw ei ganmol yn y gynulleidfa, a'i foli o flaen yr arweinwyr.

³³Mae e'n gallu troi afonydd yn anialwch, a ffynhonnau dŵr yn grasdir sych,

³⁴tir ffrwythlon yn dir diffaith am fod y bobl sy'n byw yno mor ddrwg.

³⁵Neu gall droi'r anialwch yn byllau dŵr, a'r tir sych yn ffynhonnau!

³⁶Yna rhoi pobl newynog i fyw yno, ac adeiladu tref i setlo i lawr ynddi.

³⁷Maen nhw'n hau hadau yn y caeau ac yn plannu coed gwinwydd, ac yn cael cynhaeaf mawr.

³⁸Mae'n eu bendithio a rhoi llawer o blant iddyn nhw, a dydy e ddim yn gadael iddyn nhw golli anifeiliaid.

³⁹Bydd y rhai sy'n gorthrymu [72] yn colli pobl, yn dioddef pwysau gormes, trafferthion a thristwch.

⁴⁰Mae Duw yn dwyn anfri ar y bobl fawr ac yn eu gadael i grwydro mewn anialwch heb lwybrau.

⁴¹Ond mae'n cadw'r rhai sydd mewn angen yn saff, rhag iddyn nhw ddiodde, ac yn cynyddu eu teuluoedd fel preiddiau.

⁴²Mae'r rhai sy'n byw yn gywir yn gweld hyn ac yn dathlu — Ond mae'r rhai drwg yn gorfod tewi.

⁴³Dylai'r rhai sy'n ddoeth gymryd sylw o'r pethau hyn, a myfyrio ar gariad ffyddlon yr ARGLWYDD.