Read Gobaith i Gymru Salm 115 Bible Online

Salm 115 - Gobaith i Gymru bible

Salm 115

¹Nid ni, O ARGLWYDD, nid ni — ti sy'n haeddu'r anrhydedd i gyd, am ddangos y fath gariad a ffyddlondeb.

²Pam dylai pobl y cenhedloedd ddweud, “Ble mae eu Duw nhw nawr?”

³Y gwir ydy mae Duw yn y nefoedd, ac mae'n gwneud beth bynnag mae eisiau!

⁴Dydy eu heilunod nhw'n ddim ond arian ac aur wedi eu siapio gan ddwylo dynol.

⁵Mae ganddyn nhw gegau, ond allan nhw ddim siarad; llygaid, ond allan nhw ddim gweld;

⁶clustiau, ond allan nhw ddim clywed; trwynau, ond allan nhw ddim arogli;

⁷dwylo, ond allan nhw ddim teimlo; traed, ond allan nhw ddim cerdded; a dydy eu gyddfau ddim yn gallu gwneud sŵn!

⁸Mae'r bobl sy'n eu gwneud nhw, a'r bobl sydd yn eu haddoli nhw, yn troi'n debyg iddyn nhw!

⁹Israel, cred di yn yr ARGLWYDD! Fe sy'n dy helpu di ac yn dy amddiffyn di.

¹⁰Chi offeiriaid, credwch yn yr ARGLWYDD! Fe sy'n eich helpu ac yn eich amddiffyn chi.

¹¹Chi sy'n addoli'r ARGLWYDD, credwch yn yr ARGLWYDD! Fe sy'n eich helpu chi ac yn eich amddiffyn chi.

¹²Mae'r ARGLWYDD yn cofio amdanon ni, a bydd yn ein bendithio ni — Bydd yn bendithio pobl Israel; Bydd yn bendithio teulu Aaron;

¹³Bydd yn bendithio'r rhai sy'n addoli'r ARGLWYDD, yn ifanc a hen.

¹⁴Boed i'r ARGLWYDD roi plant i chi; ie, i chi a'ch plant hefyd!

¹⁵Boed i'r ARGLWYDD, wnaeth greu y nefoedd a'r ddaear, eich bendithio chi!

¹⁶Yr ARGLWYDD sydd piau'r nefoedd, ond mae wedi rhoi'r ddaear yng ngofal y ddynoliaeth.

¹⁷Dydy'r meirw ddim yn gallu moli'r ARGLWYDD, maen nhw wedi mynd i dawelwch y bedd.

¹⁸Ond dŷn ni'n mynd i foli'r ARGLWYDD o hyn allan, ac am byth! Haleliwia!