Read Gobaith i Gymru Salm 116 Bible Online

Salm 116 - Gobaith i Gymru bible

Salm 116

¹Dw i wir yn caru'r ARGLWYDD am ei fod yn gwrando ar fy ngweddi.

²Mae e'n troi i wrando arna i a dw i'n mynd i ddal ati i alw arno bob amser.

³Roedd rhaffau marwolaeth wedi eu rhwymo amdana i; roedd ofn y bedd wedi gafael ynof fi. Ro'n i mewn helbul! Roedd fy sefyllfa'n druenus!

⁴A dyma fi'n galw ar yr ARGLWYDD, “O ARGLWYDD, plîs achub fi!”

⁵Mae'r ARGLWYDD mor hael a charedig; ydy, mae ein Duw ni mor drugarog.

⁶Mae'r ARGLWYDD yn amddiffyn pobl gyffredin; achubodd fi pan oeddwn i'n teimlo mor isel.

⁷Ond bellach dw i'n gallu ymlacio eto! Mae'r ARGLWYDD wedi achub fy ngham!

⁸Wyt, rwyt ti wedi achub fy mywyd i, cymryd y dagrau i ffwrdd, a'm cadw i rhag baglu.

⁹Dw i'n mynd i fyw'n ffyddlon i'r ARGLWYDD ar dir y byw.

¹⁰Roeddwn i'n credu ynddo pan ddywedais, “Dw i'n diodde yn ofnadwy,”

¹¹ond yna dweud mewn panig, “Alla i ddim trystio unrhyw un.”

¹²Sut alla i dalu nôl i'r ARGLWYDD am fod mor dda tuag ata i?

¹³Dyma offrwm o win i ddiolch iddo am fy achub, a dw i am alw ar enw'r ARGLWYDD.

¹⁴Dw i am gadw fy addewidion i'r ARGLWYDD o flaen ei bobl.

¹⁵Mae bywyd pob un o'i bobl ffyddlon yn werthfawr yng ngolwg yr ARGLWYDD.

¹⁶Plîs ARGLWYDD, dw i wir yn un o dy weision ac yn blentyn i dy forwyn. Rwyt ti wedi datod y clymau oedd yn fy rhwymo i.

¹⁷Dw i'n cyflwyno offrwm i ddiolch i ti ac yn galw ar enw yr ARGLWYDD.

¹⁸Dw i am gadw fy addewidion i'r ARGLWYDD o flaen y bobl sy'n ei addoli

¹⁹yn ei deml yn Jerwsalem. Haleliwia!