Read Gobaith i Gymru Salm 135 Bible Online

Salm 135 - Gobaith i Gymru bible

Salm 135

¹Haleliwia! Molwch enw'r ARGLWYDD! Addolwch e, chi sy'n gwasanaethu'r ARGLWYDD

²ac sy'n sefyll yn nheml yr ARGLWYDD, yn yr iard sydd yn nhŷ Dduw.

³Molwch yr ARGLWYDD, am fod yr ARGLWYDD mor dda! Canwch i'w enw, mae'n hyfryd cael gwneud hynny!

⁴Mae'r ARGLWYDD wedi dewis pobl Jacob iddo'i hun, ac Israel fel ei drysor sbesial.

⁵Dw i'n gwybod fod yr ARGLWYDD yn fawr; mae ein Duw ni yn well na'r ‛duwiau‛ eraill i gyd.

⁶Mae'r ARGLWYDD yn gwneud beth bynnag mae e eisiau, yn y nefoedd, ar y ddaear, ac i lawr i waelodion y moroedd dwfn.

⁷Mae e'n gwneud i'r cymylau godi ym mhen draw'r ddaear; mae'n anfon mellt gyda'r glaw, ac yn dod â'r gwynt allan o'i stordai.

⁸Fe wnaeth daro plentyn hynaf pob teulu yn yr Aifft, a'r anifeiliaid cyntafanedig hefyd.

⁹Gwnaeth arwyddion gwyrthiol yn yr Aifft yn erbyn y Pharo a'i weision i gyd;

¹⁰Concrodd lawer o wledydd a lladd nifer o frenhinoedd —

¹¹Sihon, brenin yr Amoriaid, Og, brenin Bashan, a theuluoedd brenhinol Canaan i gyd.

¹²Rhoddodd eu tir yn etifeddiaeth — yn etifeddiaeth i'w bobl Israel.

¹³O ARGLWYDD, mae dy enw di yn para am byth, ac yn cael ei gofio ar hyd y cenedlaethau.

¹⁴Mae'r ARGLWYDD yn amddiffyn ei bobl ac yn tosturio wrth ei weision.

¹⁵Dydy eilunod y cenhedloedd yn ddim byd ond arian ac aur, wedi eu siapio gan ddwylo dynol.

¹⁶Mae ganddyn nhw gegau, ond allan nhw ddim siarad; llygaid, ond allan nhw ddim gweld;

¹⁷clustiau, ond allan nhw ddim clywed. Does dim bywyd ynddyn nhw!

¹⁸Mae'r bobl sy'n eu gwneud nhw, a'r bobl sydd yn eu haddoli hefyd, yn troi'n debyg iddyn nhw!

¹⁹Bendithiwch yr ARGLWYDD, chi bobl Israel! Bendithiwch yr ARGLWYDD, chi offeiriaid!

²⁰Bendithiwch yr ARGLWYDD, chi Lefiaid! Bendithiwch yr ARGLWYDD, chi rai ffyddlon yr ARGLWYDD!

²¹Boed i'r ARGLWYDD, sy'n byw yn Jerwsalem, gael ei fendithio yn Seion! Haleliwia!