Read Gobaith i Gymru Salm 142 Bible Online

Salm 142 - Gobaith i Gymru bible

Salm 142

¹Mascîl. Salm gan Dafydd, pan oedd yn yr ogof. [83†] Gweddi. [1] Dw i'n gweiddi'n uchel ar yr ARGLWYDD; dw i'n pledio ar i'r ARGLWYDD fy helpu.

²Dw i'n tywallt y cwbl sy'n fy mhoeni o'i flaen, ac yn dweud wrtho am fy holl drafferthion.

³Pan dw i wedi anobeithio'n llwyr, rwyt ti'n gwylio'r ffordd i mi. Maen nhw wedi cuddio magl ar y llwybr o'm blaen i.

⁴Dw i'n edrych i'r dde — ond does neb yn cymryd sylw ohono i. Mae dianc yn amhosib! — does neb yn poeni amdana i.

⁵Dw i'n gweiddi arnat ti, ARGLWYDD; a dweud, “Ti ydy'r unig le saff i mi fynd, does gen i neb arall ar dir y byw!”

⁶Gwranda arna i'n gweiddi, dw i'n teimlo mor isel. Achub fi o afael y rhai sydd ar fy ôl; maen nhw'n rhy gryf i mi.

⁷Gollwng fi'n rhydd o'r carchar yma, er mwyn i mi foli dy enw di. Bydd y rhai cyfiawn yn casglu o'm cwmpas am dy fod ti wedi achub fy ngham.