Read Gobaith i Gymru Salm 145 Bible Online

Salm 145 - Gobaith i Gymru bible

Salm 145

¹Cân o fawl. Salm Dafydd. [1] Dw i'n mynd i dy ganmol di, fy Nuw a'm brenin, a bendithio dy enw di am byth bythoedd!

²Dw i eisiau dy ganmol di bob dydd a dy foli di am byth bythoedd!

³Mae'r ARGLWYDD yn fawr, ac yn haeddu ei foli! Mae ei fawredd tu hwnt i'n deall ni.

⁴Bydd un genhedlaeth yn dweud wrth y nesa am dy weithredoedd, ac yn canmol y pethau mawr rwyt ti'n eu gwneud.

⁵Byddan nhw'n dweud mor rhyfeddol ydy dy ysblander a dy fawredd, a bydda i'n sôn am y pethau anhygoel rwyt ti'n eu gwneud.

⁶Bydd pobl yn sôn am y pethau syfrdanol rwyt ti'n eu gwneud, a bydda i'n adrodd hanes dy weithredoedd mawrion.

⁷Byddan nhw'n cyhoeddi dy ddaioni diddiwedd di, ac yn canu'n llawen am dy gyfiawnder.

⁸Mae'r ARGLWYDD mor garedig a thrugarog; mor amyneddgar ac anhygoel o hael! [84†]

⁹Mae'r ARGLWYDD yn dda i bawb; mae'n dangos tosturi at bopeth mae wedi ei wneud.

¹⁰Mae'r cwbl rwyt ti wedi ei greu yn dy foli di, O ARGLWYDD! Ac mae'r rhai sydd wedi profi dy gariad ffyddlon yn dy fendithio!

¹¹Byddan nhw'n dweud am ysblander dy deyrnasiad, ac yn siarad am dy nerth;

¹²er mwyn i'r ddynoliaeth wybod am y pethau mawr rwyt ti'n eu gwneud, ac am ysblander dy deyrnasiad.

¹³Mae dy deyrnasiad yn para drwy'r oesoedd, ac mae dy awdurdod yn para ar hyd y cenedlaethau! Mae'r ARGLWYDD yn cadw ei air; ac yn ffyddlon ym mhopeth mae'n ei wneud. [85]

¹⁴Mae'r ARGLWYDD yn cynnal pawb sy'n syrthio, ac yn gwneud i bawb sydd wedi eu plygu drosodd sefyll yn syth.

¹⁵Mae popeth byw yn edrych yn ddisgwylgar arnat ti, a ti'n rhoi bwyd iddyn nhw pan mae ei angen.

¹⁶Mae dy law di yn agored; rwyt ti mor hael! Ti'n rhoi'r bwyd sydd ei angen i bob creadur byw.

¹⁷Mae'r ARGLWYDD yn gyfiawn bob amser, ac yn ffyddlon ym mhopeth mae'n ei wneud.

¹⁸Mae'r ARGLWYDD yn agos at y rhai sy'n galw arno; at bawb sy'n ddidwyll pan maen nhw'n galw arno.

¹⁹Mae'n rhoi eu dymuniad i'r rhai sy'n ei barchu; mae'n eu clywed nhw'n galw, ac yn eu hachub.

²⁰Mae'r ARGLWYDD yn amddiffyn pawb sy'n ei garu, ond bydd yn dinistrio'r rhai drwg i gyd.

²¹Bydda i'n cyhoeddi fod yr ARGLWYDD i'w foli, a bydd pob creadur byw yn bendithio ei enw sanctaidd, … am byth bythoedd!