Read Gobaith i Gymru Salm 147 Bible Online

Salm 147 - Gobaith i Gymru bible

Salm 147

¹Haleliwia! [1] Mae mor dda canu mawl i Dduw! Mae'n beth hyfryd rhoi iddo'r mawl mae'n ei haeddu.

²Mae'r ARGLWYDD yn ailadeiladu Jerwsalem, ac yn casglu pobl Israel sydd wedi bod yn alltudion.

³Mae e'n iacháu y rhai sydd wedi torri eu calonnau, ac yn rhwymo eu briwiau.

⁴Mae e wedi cyfri'r sêr i gyd, a rhoi enw i bob un ohonyn nhw.

⁵Mae'n Meistr ni mor fawr, ac mor gryf! Mae ei ddeall yn ddi-ben-draw!

⁶Mae'r ARGLWYDD yn rhoi hyder i'r rhai sy'n cael eu gorthrymu, ond yn bwrw'r rhai drwg i'r llawr.

⁷Canwch gân o fawl i'r ARGLWYDD, a chreu alaw i Dduw ar y delyn fach.

⁸Mae'n gorchuddio'r awyr gyda chymylau, ac yn rhoi glaw i'r ddaear. Mae'n gwneud i laswellt dyfu ar y mynyddoedd,

⁹yn rhoi bwyd i bob anifail gwyllt, ac i gywion y gigfran pan maen nhw'n galw.

¹⁰Dydy cryfder ceffyl ddim yn creu argraff arno, a dydy cyflymder rhedwr ddim yn ei ryfeddu.

¹¹Y bobl sy'n ei barchu sy'n plesio'r ARGLWYDD; y rhai hynny sy'n rhoi eu gobaith yn ei gariad ffyddlon.

¹²O Jerwsalem, canmol yr ARGLWYDD! O Seion, mola dy Dduw!

¹³Mae e wedi gwneud barrau dy giatiau yn gryf, ac wedi bendithio dy blant o dy fewn.

¹⁴Mae'n gwneud dy dir yn ddiogel, ac yn rhoi digonedd o'r ŷd gorau i ti.

¹⁵Mae'n anfon ei orchymyn drwy'r ddaear, ac mae'n cael ei wneud ar unwaith.

¹⁶Mae'n anfon eira fel gwlân, yn gwasgaru barrug fel lludw,

¹⁷ac yn taflu cenllysg fel briwsion. Pwy sy'n gallu goddef yr oerni mae'n ei anfon?

¹⁸Wedyn mae'n gorchymyn i'r cwbl feirioli — mae'n anadlu arno ac mae'r dŵr yn llifo.

¹⁹Mae wedi rhoi ei neges i Jacob, ei ddeddfau a'i ganllawiau i bobl Israel.

²⁰Wnaeth e ddim hynny i unrhyw wlad arall; dŷn nhw'n gwybod dim am ei reolau. Haleliwia!