Read Gobaith i Gymru Salm 16 Bible Online

Salm 16 - Gobaith i Gymru bible

Salm 16

¹Wedi ei chofnodi gan Dafydd. [1] Amddiffyn fi, O Dduw; dw i'n troi atat ti am loches.

²Dywedais wrth yr ARGLWYDD, “Ti ydy fy Meistr i; mae fy lles i yn dibynnu arnat ti.”

³Y bobl dduwiol yn y wlad ydy fy arwyr, dw i wrth fy modd gyda nhw.

⁴Ond bydd y rhai sy'n dilyn duwiau eraill yn cael llwyth o drafferthion! Dw i eisiau dim i'w wneud â'u hoffrymau o waed. Dw i ddim am eu henwi nhw hyd yn oed!

⁵Ti, ARGLWYDD, ydy'r un dw i eisiau. Mae fy nyfodol i yn dy law di.

⁶Rwyt ti wedi rhoi tir da i mi; mae gen i etifeddiaeth hyfryd.

⁷Bendithiaf yr ARGLWYDD am fy arwain i; ac am siarad gyda mi yn y nos.

⁸Dw i mor ymwybodol fod yr ARGLWYDD gyda mi. Mae'n sefyll wrth fy ochr, a fydd dim byd yn fy ysgwyd.

⁹Felly, mae fy nghalon i'n llawen! Dw i'n gorfoleddu! Dw i'n gwybod y bydda i'n saff!

¹⁰Wnei di ddim gadael i mi fynd i fyd y meirw, na gadael i'r un sydd wedi cysegru ei hun i ti bydru yn y bedd.

¹¹Rwyt wedi dangos y ffordd i fywyd i mi; bydd bod gyda ti yn fy llenwi â llawenydd a hyfrydwch diddiwedd bob amser.