Read Gobaith i Gymru Salm 17 Bible Online

Salm 17 - Gobaith i Gymru bible

Salm 17

¹Gweddi Dafydd. [1] O ARGLWYDD, dw i'n gofyn am gyfiawnder. Gwranda arna i'n galw arnat ti. Clyw fy ngweddi, sy'n gwbl ddidwyll.

²Ti sy'n gallu rhoi cyfiawnder i mi. Mae dy lygaid yn gweld y gwir.

³Rwyt wedi dod ata i yn y nos, chwilio fy meddyliau, fy mhwyso a'm mesur a chael dim byd o'i le. Dw i'n benderfynol o beidio dweud dim i dy dramgwyddo di.

⁴Dw i'n gweld beth mae pobl eraill yn ei wneud, ond dw i wedi cadw at beth rwyt ti'n ddweud, ac wedi cadw draw o ffyrdd lladron.

⁵Dw i wedi dilyn dy lwybrau di, a heb grwydro oddi ar y ffordd o gwbl.

⁶Dw i'n galw arnat ti, achos byddi di'n ateb, O Dduw. Gwranda arna i. Clyw beth dw i'n ddweud.

⁷Dangos mor ffyddlon wyt ti drwy wneud pethau rhyfeddol! Ti sy'n gallu achub y rhai sy'n troi atat i'w hamddiffyn rhag yr ymosodwyr.

⁸Amddiffyn fi fel cannwyll dy lygad. Cuddia fi dan gysgod dy adenydd.

⁹Cuddia fi oddi wrth y rhai drwg sy'n ymosod arna i; y gelynion o'm cwmpas sydd eisiau fy lladd.

¹⁰Maen nhw'n gwbl ddidrugaredd! Maen nhw mor falch wrth gega!

¹¹Maen nhw wedi fy amgylchynu i, ac maen nhw am fy mwrw i'r llawr.

¹²Maen nhw fel llew yn edrych am ysglyfaeth, neu lew ifanc yn llechu o'r golwg.

¹³Cod, ARGLWYDD! Dos allan yn eu herbyn. Taro nhw i lawr gyda dy gleddyf! Achub fi rhag y rhai drwg;

¹⁴Achub fi o afael y llofruddion, ARGLWYDD! Lladd nhw! Paid gadael iddyn nhw fyw! Ond i'r rhai sy'n werthfawr yn dy olwg — rwyt yn llenwi eu boliau, mae eu plant yn cael eu bodloni a byddan nhw'n gadael digonedd i'w rhai bach.

¹⁵Caf gyfiawnder, a bydda i'n gweld dy wyneb! Pan fyddaf yn deffro, bydd dy weld yn ddigon i mi!